Qidiruv

sft. 1. Qattiq tortilgan, solqa yoki burushiq joyi qoldirilmasdan kerilgan.

Tarang tortilgan arqon.

Nafisa koʻrdiki, ip juda tarang tortildi, endi shirt etib uzilib ketishi mumkin. — Shuhrat, Jannat qidirganlar

Bu tor, tarang kiyimda uning kelishgan qomati yanada boʻrtib turardi. — S. Siyoyev, Otliq ayol

2. Toʻlishib silliq tortgan, tekis.

Tarang siynalar qora koftaga sigʻmay, qoʻsh choʻqqiga aylangan. — S. Siyoyev, Otliq ayol

Bir necha kun ichida Nodirjonning eti ustuxoniga yopishdi, eti, tarang peshonasida ajinlar paydo boʻldi. — A. Muhiddin, Chap choʻntak

3. koʻchma Ayrim soʻzlar bilan qoʻllanib, narsa, holat kabilarning yuqori darajasini, soʻnggi chegarasini bildiradi.

Uning butun vujudi hayajon bilan tarang tortilgan edi. — P. Qodirov, Uch ildiz

uning uyatchan koʻzlariga koʻzi tushib, tarang asablari birdan boʻshashib ketdi. — S. Nurov, Narvon

Salomxonadagi tarang vaziyat bir oz yumshagandek boʻldi. — S. Siyoyev, Yorugʻlik

Nizomjon ana shu oilada, hamisha tarang roʻz-gʻor ichida oʻsdi. — S. Ahmad, Ufq

fl. 1. Taroq yoki boshqa biror narsa bilan soch, soqol va shu kabilarning chigilini yozmoq, tekislamoq.

Shundan keyin sochlarini bir tomonga silliq taragan tilla tishli yigit qoʻl koʻtardi. — N. Aminov, Suvarak

Otam oʻylanib qoldi. Soqolini barmoqlari bilan taradi. — Oydin, Sadagʻang boʻlay, komandir

Qorongʻida sokin turgan otning boʻynidan quchoqladi, barmoqlari bilan yolini taradi. — Oybek, Tanlangan asarlar

2. q. x. Ariq-joʻyaklarga suvni bir meʼyor-da taqsimlab oqizmoq, taratmoq.

Joʻyak olingan joylarda tajribakor suvchilar chanqagan gʻoʻzalarga suv tarardilar. — Sh. Rashidov, Boʻrondan kuchli

Shermat ota ikki gektarlik kartaga suv tarab boʻldi-da, egatlarni koʻzdan kechirib, oʻqariq boʻyiga chiqdi. — H. Nuʼmon, Fasllar

3. koʻchma poet. Yoymoq, sochmoq.

Qorli togʻlar orqasidan Atlas sochin tarab quyosh, Goh moʻralab, oʻynatar qosh, Xanda sochar dudogʻidan. — Gʻayratiy

ot Tarang holat (tarang toʻgʻri va koʻchma maʼnoda).

Boʻgʻizda tiqilib, oʻrtada toʻlib turgan nafasni faqat sarbast gap bilan, oʻrtadagi taranglikni yoʻqotuvchi erkin soʻz bilan oʻnglash mumkin edi. — M. Ismoiliy, Fargʻona tong otguncha

— Yoʻq, Sherali Nazarovich, — dedi hamon tarangligidan tushmagan Rasuljon, — toʻgʻri aytdingiz. — J. Abdullaxonov, Xonadon

fl. Tortib yoki kerib, tarang holga keltirmoq.

Dorni taranglamoq. Dutorning ipini taranglamoq. Matoni taranglab, gul tikmoq.

Uchastka etagidagi ikki yigit simni taranglab, belgi qilingan tugmachani nazorat chizigʻiga baravarladi. — R. Rahmon, Tinib-tinchimas

тургор

fl. Taranglamoq feʼlining majhul nisbati.