Қидирув

от 1. дин. 1 Шариатда барча мусулмонлар учун бажарилиши мажбурий бўлган диний амаллар.

Ҳаж исломий фарзларнинг бешинчиси ва сўнггисидир. — Газетадан

мусулмонлар учун худонинг айтгани фарз бўлиб, унга шак келтириш, ундан зорланишнинг ўзи ҳам гуноҳ ҳисобланади. — УТА

2. Бажарилиши зарур бўлган ахлоқий-маънавий вазифа, бурч.

Ёшнинг ҳурмати — қарз, қарининг ҳурмати — фарз. — Мақол

Қарз, қарзни бериш фарз. — Мақол

Кексалардан кўнгил сўраб туриш, кези билан кўмак бериш ёшларга фарз-у қарз. — Газетадан

от Шахмат ўйинида энг кучли дона, сипоҳ.

Фарзинни юрмоқ.

Азимов қора фарзинни қўлида бир оз ушлаб туриб, тақиллатиб босди-да, Шах! деди. — И. Раҳим, Чин муҳаббат

от 1. Битта ота-онадан дунёга келган бола; ўғил ёки қиз (ота-онага нисбатан); бола.

Фарзанд азиз, одоби ундан азиз. — Мақол

Давлатнинг боши — фарзанд. — Мақол

Ота-онанг — давлатинг, Фарзандларинг — савлатинг. — Мақол

Фарзанд — бу келажак, фарзанд — ўтган аждодларни келажак авлодлар билан абадий боғлайдиган ҳалқа. — К. Яшин, Ҳамза

Асрорқул фарзанд кўрди боланинг отини Ёдгор қўйди. — А. Қаҳҳор, Асрор бобо

2. кт. кўчма Ўз Ватани ёки халқига манфаат келтирадиган, унга астойдил хизмат қиладиган киши; ватанпарвар, элсевар.

Ватаннинг содиқ фарзандлари. Миллат фарзанди.

Мустақил давлат фарзанди эканлигимдан бошим осмонга етди. — Газетадан

3. кўчма Бирор жамоа, ижтимоий-сиёсий, ғоявий гуруҳ, ҳаракат ёки ҳудудга мансуб, унга алоқадор шахс.

Мусулмон фарзанди.

— Мусулмон фарзандисиз, дилингиздаги васвасани ҳайданг. — К. Яшин, Ҳамза

Қайлардадир фисқ-у фасод, ҳасад, хусумат Инсоният фарзандларин тортмоқда дорга. — А. Орипов, Йиллар армони

4. кўчма Бирор маънавий, руҳий фаолият маҳсули.

Шеър — илҳом фарзанди. Ақл — эҳтиёж фарзанди.

сфт. Фарзанди бор, фарзанд кўрган; болали. Фарзандли аёл.

Фарзандли уй доим бўлар лолазор — Эрали ва Шерали

Дугонамнинг ўғли бир қиз билан севишиб, турмуш қурдилар, фарзандли бўлдилар. — Газетадан

от Фарзанд мақомида бўлиш, фарзанднинг бурч ва мажбуриятларини адо этиш; бирор кимсага фарзанд бўлиш.

Фарзандлик бурчи. Фарзандлик саломи.

Биз фарзандлик бурчин ўйлаб, танладик аъмол. — А. Шер, Қадимги куй

сфт. Фарзанди ёʻқ; бефарзанд, боласиз.

Иккови ҳам катта бўлди. Бойсари — бой, Бойбўри шоҳ эди. Иккови ҳам фарзандсиз бўлди. — Алпомиш

Эрининг фарзандсиз бева аммаси уни [Мунисни] жуда совуқ кутиб олди. — С. Аҳмад, Хотин