fl. 1. Istak-talabni bajarishga koʻrsatma bermoq; buyruq bermoq, amr, farmon qilmoq.
Ish buyurmoq. Bolani ishga buyur, ketidan oʻzing yugur. — Maqol
Ishyoqmasga ish buyursang, Senga aql oʻrgatar. — Maqol
Uning nozikligi, koʻhlikligi hurmati ayab, yengil-yelpi ishlarni buyurardi. — S. Ahmad, Ufq
Men hazrati oliylari buyurgan Madrasa tarhini chizish bilan bandmen. — P. Qodirov, Yulduzli tunlar
Hokim yasovulni chaqirib, yoʻlga hozirlanishni buyurdi. — M. Ismoiliy, Fargʻona tong otguncha
Oʻlimga buyurdingiz, bizning nima gunohimiz bor ekan? — Luqmoni Hakim
2. Biror narsani tayyorlab berish uchun murojaat qilmoq; buyurtma bermoq, buyurtirmoq.
Palto buyurmoq.
Muhiddin toleiga ofitsiant ham tez kela qoldi. Choy va ovqat buyurdi. — R. Fayziy, Choʻlga bahor keldi
Kelin poshshaga tilla uzuk buyurdingizmi? — A. Qodiriy, Oʻtgan kunlar
Tuflini darhol gilamga qoʻyib, kiyib koʻrdi: — Oʻzimga buyurtirilganday! — H. Gʻulom, Toshkentliklar
3. Topshirmoq, bermoq (qonun yoʻli bilan).
Nafaqa kerak boʻlsa, daromadimning yarmini oling, lekin bolani tinch qoʻying. Bermayman, ovora boʻlmang! — Nega? Bolani onaga buyuradi-ku! — A. Qahhor, Qoʻshchinor chiroqlari
4. tib. Tavsiya qilmoq, yozib bermoq, (dori-darmon, parhez va shu kabilar haqida).
Parhez buyurmoq.
Faqir bu sabilga ogʻushtabiz, bavajh dafʼi savdoyi tabib buyurgan. — Hamza, Tanlangan asarlar
Menmi? Menga nima rom kelishini oʻzim ham bilmayman. Lekin doktorlar konyak buyuradilar, mayli, konyak boʻlsin. — Oybek, Tanlangan asarlar
5. Biror ish, topshiriq bilan biror joyga yubormoq, joʻnatmoq.
Xushroʻy xizmat-chini oʻchoq boshi yumushlariga buyurib, choyni oʻzi qoʻydi. — A. Qodiriy, Oʻtgan kunlar
Oʻzbek oyim burchakda bola koʻtarib oʻtirgan Zaynabdan chaqaloqni olib, uni jomni toʻkib kelishga buyurdi. — A. Qodiriy, Oʻtgan kunlar
Xizmat desa juda abjir boʻlaman, Nima buyursangiz, ishlab kelaman. — Murodxon
6. Taqdir qilmoq; xohlamoq, istamoq.
Tangrining buyurgani shu ekan. Lekin, Meʼmor, siz yaxshi odamsiz, dilimga yoqasiz. — Mirmuhsin, Meʼmor
— Oʻgʻlim, koʻngil buyurgan ishdan zaruri boʻlmaydi, — dedi rais Toshpoʻlatovga. — R. Fayziy, Choʻlga bahor keldi
- Buyuring yoki buyursinlar 1. Buyrugʻingizni beravering, buyrugʻingizni bajarishga tayyorman (tayyormiz). Sizga ogʻir kelmasa, bir xizmat topshirmoqchiman, usta! — Buyuringiz! — A. Qodiriy, Oʻtgan kunlarBu ishlarni menga buyuring, bekam! — Mirmuhsin, MeʼmorJuman pismiqqa murojaat qildi: — Buyuringiz, afandim! — M. Ismoiliy, Fargʻona tong otguncha.;[Volkov:] Afandilar, stolga buyursinlar! — N. Safarov, Tanlangan asarlar
- Aybga buyurmoq Aybga buyurmaysiz, oʻgʻlim meʼmorlikni oʻrgansin, otasidek sangtarosh boʻlib qolmasin, dedim. — Mirmuhsin, Meʼmor
- Tashrif buyurmoq Bir haftadan keyin qiz Jamolzodaning ustaxonasiga tashrif buyurdi. — Yoshlik