fl. 1. Bosmoq 1—7, 10—13, 16—17, 21, 24 feʼllarining majhul nisbati.
Tepki bosildi. Ming kilometr yoʻl bosildi. Maqola bosilib chiqdi. Ogʻir bosilguncha, yengil koʻtarilar. — Maqol
Qingʻir-qiyshiq sertuproq koʻchaning har yer-har yerida pastak, tomiga pichan, beda bosilgan uylar. — S. Ahmad, Hukm
E, ungacha urush ham bosiladi. — S. Siyoyev, Yorugʻlik
— Oʻltiring, oʻltiring, mehmon! — dedi usta Farfi, — oshga sabzi bosildi-pishdi. — A. Qodiriy, Oʻtgan kunlar
Uch oydan soʻng roman Yolqin jurnalida bosila boshladi. — O. Moʻminov, Xiyobondagi uch uchrashuv
Isfandiyorning muhri bosilgan qogʻoz tasir qildimi, olomonning shashti pasaydi. — S. Siyoyev, Avaz
Sultonmurod qaynagan olomon ichida turtki yeb, bosilib, ezilib, uzoq yurdi. — Oybek, Navoiy
2. Bosmoq 5, 16—17, 23 feʼllarining oʻzlik nisbati.
Ogʻriq bosildi. Oyogʻimning qaltirogʻi endi bosildi.
Bosh ogʻrigingiz bosilmasa, bir-ikki kun ishga chiqmasangiz ham mayli. — S. Ahmad, Saylanma
Dahlizda bir piyola sovuq suv ichdi. Yuragi kuygani bosilmadi shekilli, yana quymoqchi boʻldi. — Choʻlpon, Kecha va kunduz
Toʻzon bosilar-bosilmas, bir eshikdan ketmon, choʻkich, bolta koʻtargan kishilar chiqib qolish-di. — Guldasta
-Bilmadim-bilmadim,— deb qoʻydi doktor hamon taajjubi bosilmay. — K. Yashin, Hamza
Gʻovur bosildi. Bir lahza jimlikdan soʻng, kulgi koʻtarildi. — A. Qahhor, Asarlar
— Koʻnglingiz bosildimi? — Kumush javob oʻrnida yostiqdan qoʻzgʻaldi. — A. Qodiriy, Oʻtgan kunlar
— Yoʻtalim bosildi, oyi, — dedi Poʻlat Xayrini yupatib. — Sh. Rashidov, Qudratli toʻlqin
3. koʻchma Tartibga tushmoq, sipolashib qolmoq, vazminlashmoq, quyilmoq, tiyilmoq.
— Ancha bosilib qolgan, hayotiga qaytgan yigitimiz shu boʻladi, — dedi — Ismoil, Gazetadan