Qidiruv

fl. 1. Parchalanmoq, maydalanmoq, boʻlaklarga ajralmoq, uzilmoq.

Shisha sindi. Qalam sinib soldi. Koʻza kunda sinmaydi, kunida sinadi. — Maqol

Qayin daraxtining egilgani —singani, Er yigitning uyalgani — oʻlgani. — Maqol

Qoʻlidagi dastalangan paxta gulli piyoladan biri yerga tushib, chil-chil sindi. — T. Ashurov, Oq ot

Oyogʻingning ostida nogoh Chirs etar-u, sinib tushar shox — X. Davron, Bolalikning osmoni

Yel ketma-ket boʻkirar, bunga chiday olmagan shox-shabbalar chars-churs sinar edilar. — A. Qodiriy, Oʻtgan kunlar

2. Zarb yeb shikastlanmoq, parchalanmoq (gavda suyaklari haqida).

Umar bilagi sinib, boshi yorilib, tuproqda behush yotardi. — S. Yunusov, Kutilmagan xazina

3. Shikastlanib ishdan chiqmoq, yaroqsiz holga kelmoq.

Arava sindi, hoʻkiz oʻldi. — Maqol

— Xafa boʻlmang, aka, — dehqonning yelkasini qoqib yupatdi Yoʻlchi, — falokat emas —

arava sinadi, tuzatiladi. — Oybek, Tanlangan asarlar

Singan sozi qaytadan Tilga kirganday, Xazon boʻlgan bahori Gulga kirganday. — Gʻayratiy

4. koʻchma Konkurensiyada, raqobatda yengilmoq, bankrotlashmoq, xonavayron boʻlmoq.

[Saidahmad:] Zamon juda loyqalanib ketyapti, hali qarasang, u boy sinibdi, hali qarasang, bu boy. — Oybek, Ulugʻ yoʻl

5. koʻchma Maʼnaviy zarba olmoq.

Odamning koʻngli nozik boʻladi: bir kichkina narsa bilan yo sinadi, yo koʻtariladi. — M. Ismoiliy, Bizning roman

— Agar bolaning ruhi sinsa, shunaqa betga chopar, kattaga soʻz qaytaradigan, qaysar boʻladi, — dedi [Akbarxoʻja]. — P. Tursun, Oʻqituvchi

6. koʻchma Yengilmoq, mahv boʻlmoq.

Sinmas iroda. Haqiqat bukiladi, ammo sinmaydi. — Maqol

fl. 1. Sinovdan oʻtkazmoq, tekshirmoq, tekshirib koʻrmoq.

Tayyor mashinalarni sinamoq. Sinamagan otning sirtidan oʻtma. — Maqol

Er yigitni maydonda sina. — Maqol

U [Aziz Abdurazzoq] faqat sheʼr yozib qolmay, nasriy hajvchilikda ham kuchini sinamoqda. — Mushtum

Shildir-shildir qamishga sirgʻam tushdi, yor-yor, Sinalmagan yigitga singlim tushdi, yor-yor. — Oq olma, qizil olma

2. Bir predmetni (masalan, dorini, taomni) ishlatib koʻrib yoki isteʼmol qilib, taʼsirini aniqlamoq.

Tohirjon kinoya bilan jilmaydi: — Barcha dorini sinadim. Meniki bedavo dard. — Oybek, Tanlangan asarlar

3. Imtihon qilib, bilim darajasini aniqlamoq.

Oʻquvchilarni fizikadan sinab koʻrmoq.

4. Oʻsmoqchilab soʻramoq, qoʻyniga qoʻl solmoq.

Uning [Hotamning] saxiyligi rostmi, yolgʻonmi — sinash maqsadida, bir-ikki odam oʻsha tulporni soʻrab, oldiga borishibdi. — Shukrullo, Javohirlar sandigʻi

5. Boshidan kechirmoq, oʻz tajribasida, hayotida koʻrib bilmoq.

Qarzga yoʻliqqandan koʻra, baloyi nogahonga yoʻliqqan yaxshi. Hammasini sinadik. — Oybek, Tanlangan asarlar

Sinasin oʻz baxtini, Baxti qoʻllasin uni. — H. Olimjon

ot Kishilarning tarixan shakllangan ishlab chiqarish tizimida, ijtimoiy mehnatni tashkil etishda muayyan mavqe va oʻringa ega boʻlgan, ishlab chiqarish vositalariga, ijtimoiy boylikning taqsimla-nishiga bir xil daxldorligi va manfaatlarining umumiyligi jihatidan birlashgan katta guruhi; nisbatan barqaror boʻlgan katta ijtimoiy qatlam.

Ijtimoiy sinflar. Mulkdorlar sinfi.

Oʻzbekistonda fuqarolarga mulkdor boʻlish huquqining berilishi jamiyatni qarama-qarshi sinflarga boʻlib oʻrganish gʻoyasini ham inkor etadi. — OʻzME

Hozir sotsiologiyada jamiyatni sinflarga va boshqa ijtimoiy guruhlarga boʻlishning turli mezonlari ilgari surilmoqda. — OʻzME

ot kim. Mendeleyev davriy sistemasining II guruhiga mansub kimyoviy element, kumushsimon-oqish, yaxshi choʻkichlanadigan metall, rux.

ot 1. 1 Bino va inshootlar devorining taglik yogʻoch bilan sarrovi oʻrtasiga qadalgan yogʻochlar.

Laylak uya bostirmaning oldi koʻtarilib, orqasi koʻcha tomonga bosib keta boshladi. Uncha zich qilib solinmagan sinchlar orasidan duv etib guvalalar toʻkilib tushdi. — D. Nuriy, Osmon ustuni

2. Imoratning, devorning shu qismi uchun bop yogʻoch.

Imoratga sinch olmoq.

ot tib. Vitamin yetishmasligi tufayli yuz beradigan, darmonsizlik, tish milklarining boʻshashuvi, qonashi va tishlarning toʻkilishi bilan xarakterlanadigan kasallik.

C vitamini raxit, avitaminoz, singa kasalliklaridan saqlaydi. — Saodat