фл. 1. Зўрлик билан ёпирилиб тортиб олмоқ, олиб қўймоқ.
Қўқонни талаб, бизнинг устимизга қўшин тортиб келаётган Султон Аҳмад мирзо эса бизнинг подшомиз билан бир отадан бўлган оға-инилар. — П. Қодиров, Юлдузли тунлар
2. Талашиб-тортишиб харид қилмоқ.
Янги китобни бирпасда талаб кетишди.
3. Кўп бўлиб, биргалашиб ташланмоқ, ёпишмоқ.
Арилар таламоқ.
Болалар бараварига Раҳимни талай бошлашди. — Ҳ. Назир, Ёнар дарё
4. Киши ёки нарсага давомли (такрор-такрор) ҳужум қилмоқ, шу тарзда юлиб-юлқимоқ.
Ҳув анави ялангликка қаранглар! Унда одамзод суяги ётибди. Бечорани қашқир талаган бўлса керак. — Мирмуҳсин, Меъмор
5. кўчма с. т. Қаттиқ уришиб бермоқ, юлиб-юлқиб ёпишмоқ.
Кичкина бир қизчадан дакки еган аёл Эргашойни талаб берди. — Н. Сафаров, Олияхон Султонова
6. кўчма с. т. Таталамоқ, тирнамоқ, ғаш қилмоқ.
[Алишернинг] Кўнглини шубҳа, ғазаб, пушаймон ҳислари талар эди. — М. Осим, Зулмат ичра нур
- Ичини ит (ёки ари) таламоқ Ўта бетинч бўлмоқ, безовталанмоқ. Ҳамма ўз иши билан банд. Биргина Низомжоннинггина ичини ари талаяпти. — С. Аҳмад, Уфқ