Qidiruv

тихонько, осторожненько

sft. 1. 1 Ohista harakat bilan, asta, oshiqmasdan, shoshilmasdan.

Sekin yurmoq. Eshik sekin ochildi. Daryo sekin oqardi.

Raʼno sekin boshini koʻtarib kulumsidi va yuzini chetga oʻgirdi. — A. Qodiriy, Mehrobdan chayon

Qamalgan tutun juda sekin tarqalmoqda edi. — Oybek, Tanlangan asarlar

2. Bilinar-bilinmas, sezilar-sezilmas.

Sherigim meni sekin turtib imladi. Qabulxonaga chiqdik. — A. Qahhor, Bek

[Fotimaning] Oʻgʻlining sochlariga teggan barmoqlari sekin qimirladi-yu, silashga ham jurʼat etolmay, toʻxtab qoldi. — O. Yoqubov, Er boshiga ish tushsa

Atrofda tobora odam koʻpayib borar, birov unga uzoqdan taʼzim qilar, birov quyuqqina koʻrishar, notanish kishilar sekin kalla silkib qoʻyardi. — S. Siyoyev, Yorugʻlik

3. Ehtiyotkorlik bilan, asta-asta; ozor bermay, avaylab.

Yaraning lattasini sekin koʻchirmoq. Zirapchani sekin olib tashlamoq.

Talʼat piyolani sekingina stol burchagiga qoʻydi. — Oʻ. Hoshimov, Qalbingga quloq sol

4. Vazminlik bilan, hovliqmasdan, ohista.

Sekin tushuntirmoq.

Agar men bir boyning oʻgʻli boʻlsam, Nuri meni sevsa, ota-onasiga aytmaganda ham, atrofdagilarga sekin bildirgan boʻlar edi. — Oybek, Tanlangan asarlar

5. Past tovush bilan; eshitilar-eshitilmas.

— Sekin! Sekin gapir! — Hakimboyvachcha labini tishladi, — xotinlar eshitsa, gap-soʻz chuvaladi. — Oybek, Tanlangan asarlar

Alimardon sekin uf tortib qoʻydi. — Oʻ. Hoshimov, Qalbingga quloq sol

6. Oz-ozdan, astalik bilan; kam-kamdan.

Ilojsiz qolgan dehqon bahoni sekin kamaytirib, yetti soʻmga tushdi. — Oybek, Tanlangan asarlar

ot 1. Sustlik, oshiqmaslik; sezilar-sezilmaslik.

Harakatning sekinligi. Surʼatning sekinligi. Tovushning sekinligi.

Afsuski, bu ish juda sekinlik bilan amalga oshirilyapti. — Gazetadan

2. Vazminlik; ogʻirlik.

Sekinlik bilan tushuntirmoq.

Uvushgan qalbimni sekinlik bilan Ezar edi boʻm-boʻsh bu shahar. — A. Oripov

rvsh. ayn. Asta-sekin.

Sekin-asta yurmoq.

Quyosh sekin-asta koʻtarilib, qalin shoxlar orasidan moʻralay boshladi. — I. Rahim, Chin muhabbat

Qotmadan kelgan harakatchan bu yigitning nomi sekin-asta odamlarning tiliga tusha boshladi. — Gazetadan

fl. Tezligini, surʼatini pasaytirmoq.

Poyezd sekinlab, goh toʻxtab, goh jadallab, qor bosgan bepoyon sahrodan borar edi. — A. Qahhor, Oltin yulduz

Shofyor sekinladi-yu, toʻxtamadi. — S. Siyoyev, Otliq ayol

rvsh. 1. Ayn. asta-sekin.

Sekin-sekin yurmoq. Sekin-sekin gapirmoq. Sekin-sekin koʻtarilmoq.

Subh azoni aytilib, sekin-sekin tong yorib bordi. — A. Qodiriy, Oʻtgan kunlar

2. Tadrijiy ravishda, daraja-badaraja, pogʻonama-pogʻona; oz-ozdan.

Sekin-sekin unutmoq.

Ona oʻlimiga chiday olmagan kabi koʻringan Nuri sekin-sekin taqdirga tan bergan edi. — Gazetadan