ПРОМЫВКА СКВАЖИНЫ

quduq tubini maydalangan jins zarralari — shlamdan uzluksiz tozalash, jins maydalovchi uskunalarni sovutish, quduq devorini mustahkamlash va boshqa maqsadlarda bajariladi. Shuningdek, Q.yu. orqali ayrim gorizontlarni ajratish, jinslarning qattiqligini pasaytirish, burgʻilash uskunasini moylash va sh.k. mumkin boʻladi. Burgʻilash amaliyotida Q.yu. uch: toʻgʻri, teskari va murakkab xillarga boʻlinadi. Toʻgʻri yuvishda (P.6-rasm) suyuqlik quduqqa nasos 1 yordamida shlang 2 boʻyicha salnik 3 va burgʻilash quvurlari 4 orqali haydaladi. Quduq tubini, jins maydalayotgan uskunani 5 yuvib zarralarni quduq tanasi boʻylab yuqoriga koʻtaradi. Yer yuzasida burgʻilash eritmasi maxsus tayyorlangan tozalash navlari 6 va tindirichlarda 7 harakatlanadi, natijada undagi zarralar choʻkadi va tozalangan suyuqlik sigimdan shlang 9 orqali nasosga soʻriladi va quduqqa qayta haydaladi. Toʻgʻri yuvishning quyidagi kamchiliklari qayd qilinadi: yumshoq va beqaror jinslardan kern toʻliq chiqmaydi, uning koʻp qismi suyuqlik oqimi taʼsirida yuvilib ketadi; diametri katta quduqlarni burgʻilashda suyuqlik koʻp miqdorda zarur boʻladi. Teskari yuvishda nasos yordamida suyuqlik shlang 11 boʻyicha zich yopilgan quduq ogʻzi 12 orqali quvur tashqi boʻshligʻiga uzatiladi. Quduq tubini va jins maydalovchi uskunani 5 yuvib, suyuqlik burgʻilash quvurlari 4 ichidan yuqoriga salnik 5, shlang 10 orqali koʻtariladi va aylanish sistemasiga tushadi. Teskari yuvishda quduq tubi shlamdan yaxshi tozalanadi, kern sifati oshadi, katta diametrli quduqlarni burgʻilashda suyuqlik sarfi kamayadi, suyuqlikning yutilishi ham oz boʻladi. Teskari yuvishni amaliyotda qoʻllash koʻp mehnat talab qiladi. Murakkab yuvishda suyuqlikning quduq tanasida harakatlanishi toʻgʻri yuvish, quduq tubida — teskari yuvish sxemasiga mos keladi. Yuvishning bunday sxemasi maxsus snaryadlar yordamida amalga oshiriladi. Suyuqlikning teskari harakatini salnikli maxsus oʻtkazgichdan oʻtayotgan suyuqlik bosimi, chuqurlik suv oqimli nasos yoki turbina turidagi gidrodvigatelli markazdan qochma kuchli nasos orqali yuzaga keltirish mumkin. Geologiya-razvedka ishlari amaliyotida murakkab yuvish sxemasi keng qoʻllaniladi. Quduqni yuvishda uning ichiga yuboriladigan suyuqlik miqdorini aniqlash muhim rol oʻynaydi. Keragidan ortiqcha miqdorda suyuqlik haydash noxush oqibatlarga olib kelishi, mas., boʻsh jinslarni burgʻilashda uning devorlarini yuvib ketishi mumkin. Quduq tubini shlamdan butkul tozalash, Quduqni yuvish