oʻgʻil
ўғилoʻgʻil
ot 1. Er jinsidagi bola.
Bola oʻgʻilmi, qizmi?
Bu qizdan bir balo chiqadi. Oʻnta oʻgʻilning oʻrnini bosadi. — S.Ahmad, Ufq
2. Er jinsidagi farzand (oʻz ota-onalariga nisbatan).
Oʻqigan oʻgʻil — otadan ulugʻ
Maqol. Oʻgʻli borning oʻrni bor, qizi borning qadri bor. — Maqol
Komilning oʻgʻli ota-onasini Toshkentga koʻchirib ketibdi. — A. Qahhor, Qoʻshchinor chiroqlari
Mehmonni yuqori oʻtqazib, darhol oʻgʻliga dasturxon yozishni buyurdi. — Mirmuhsin, Meʼmor
3. (faqat 1-shaxs egalik qoʻshimchasi bilan) Farzandi tengi shaxsga nisbatan murojaat shakli.
Chol bu begona yigitning vaziyatida taraddudlanish sezib, qaytadan soʻradi: — Xoʻsh, oʻgʻlim, nima arzing bor? — Oybek, Tanlangan asarlar.
4. Oʻgʻil (xotin-qizlar ismi).
- Oʻgʻil bola Hovli eshigidan yosh-yosh oʻgʻil va qiz bolalar chuvullashib chiqishdi. — Oybek, Tanlangan asarlarToʻraboy aka, gapimizni yerda qoldirmay kelibsiz, boʻldi! Oʻgʻil bola ekansiz, boshqa gap yoʻq! — S. Anorboyev, Goʻzallik izlab.
- Oʻgʻil toʻyi Toʻlamat oʻgʻil toʻyi qilganda, u ham bel bogʻlab, xizmatini ayamagan. — S. Anorboyev, Oqsoy.
- Gapning oʻgʻil bolasi yoki oʻgʻil bola gap Eng maʼqul tushgan, eng toʻgʻri, haqqoniy gap. Gapning oʻgʻil bolasini aytdingiz, oqsoqol. Mavlon aka sigirning sutini ichmaydigan odam, buzoqning haqi bor deb. — H. Gʻulom, Mashʼal