ochilmoq

очилмоқ

7 ta lugʻatda uchraydi JSON Shevalarda Barcha qidiruv natijalari

Izohli lugʻat

ochilmoq

fl. 1. Ochmoq 1-8 feʼlining majhul nisbati.

Eshik ochildi. Sandiq ochildi. Yoʻl ochildi. Yangi maktab ochildi. Qingʻir ish qirq yildan keyin ham ochiladi. — Maqol

Bir haftaga qolmay kanalga suv ochiladi. — S. Ahmad, Ufq

Mana shu togʻlarning ikki tarafidagi adirlar, Makrit choʻlidan ochilgan yerlarning hammasi meniki, menga qaraydi. — S. Ahmad, Jimjitlik

Haykalchaning ochilish marosimi boʻlib oʻtganidan bexabar, parda tutishga hojat qolmaganini bilishmaydi. M. — M. Doʻst, Lolazor

Yaqinrogʻingizda oʻlmoq uchun dushman tomonidan uyingizga ochilgan tuynukchaga kirdim. — A. Qodiriy, Oʻtgan kunlar

Hasanali Uzoq; oʻylagandan soʻng ishning ochilmay qolgan qismini yechishni boshqa vaqtga qoldirmoqchi boʻldi. — A. Qodiriy, Oʻtgan kunlar

2. Ochmoq 1, 2, 9-12 feʼlining oʻzlik nisbati.

Fikri ochildi. Rangi ochildi.

Keldi ochilur chogʻing, oʻzliging namoyon qil, Parchalab kishanlarni, har tomon parishon qil. — Hamza

Bu paxta ekan-ku, hali shoshmay turinglar, ochilgan xotinlar boshqatdan paranjiga kiradi. — S. Ahmad, Hukm

Tomlardagi lolalar qip-qizil boʻlib ochildi. — M. Ismoiliy, Fargʻona tong otguncha

Soʻnggi quyoshli kunlarda paxta yana qiygʻos ochildi. — I. Rahim, Ixlos

3. Boshlanmoq, ish boshlamoq.

Ertaga shu muammoga bagʻishlangan olimlarning yigʻilishi ochiladi. — S. Zunnunova, Koʻk chiroq

4. Koʻrinmoq, namoyon boʻlmoq.

Yoʻlchining koʻziga jannatday katta bogʻ manzarasi ochildi, tomosha qilib, keksa togʻaning orqasidan yura berdi. — Oybek, Tanlangan asarlar

Agar mana shu Muzloq togʻning sirtiga chiqilsa, kishining koʻzi oldida biri-biriga zid ikki dunyo ochiladi. M. Ismoiliy, Fargʻona tong otguncha

5. Xafaligi yoki qahr-gʻazabi yoʻqolib xushnud boʻlmoq, yozilmoq.

— Goho biron kishi [buvimning] koʻnglini ogʻritganda, men unga bir ogʻiz yumshoq gap aytsam, oʻsha zamoni ochilib ketaqolardi, — dedi Kenja. — H. Nazir, Asarlar

Elmurod uning [Gulsumning] bu kadar ochilib kulganini birinchi koʻrishi edi. U bundan rohat qildi. — P. Tursun, Oʻqituvchi

6. Husniga husn qoʻshilib, tobora chiroyli boʻlmoq, goʻzallashmoq.

Zunnunovning nazarida Saodatxon yanada ochilib ketganga oʻxshaydi. — I. Rahim, Ixlos

Qora koʻylak ichida boʻgʻilib yotgan ekansan. Qara, naq shaftoli gulidek ochilibsan, kel, pardoz qilamiz. — N. Safarov, Sharq tongi

Bashirjon uzoqroqdan kelinga tikilib turarkan: Juda ochilib ketibdi, deb oʻyladi. — N. Aminov, Qahqaha

Basharasi ochilmoq Kirdikori, aybi, aslida kimligi fosh boʻlmoq. Toʻgʻri, Rahimjon Moʻydinovga tuhmat qilganlarning avra-astari agʻdarildi, haqiqiy basharasi ochildi. — Mushtum
Bahridili ochilmoq Kayfiyati yaxshi boʻlmoq, chehrasi yorishmoq. Shiypon orqasidagi gʻoʻzalarni koʻrib, Paygʻomovning bahridili ochilib ketdi. — S. Nurov, Maysalarni ayoz urmaydi
Chehrasi ochilmoq Ayn. bahridili ochilmoq.
Baxting ochilsin
Jagʻi ochilmoq Toʻxtovsiz gapirmoq; koʻp, uzoq gapirmoq. Oshno bir muddat jimib qoldi, lekin lahza oʻtib, tagʻin jagʻi ochildi. M. M. — Doʻst. Lolazor.
Ishtahasi ochilmoq Ishtiyoq bilan ovqat yemoq Ana endi, charchoq ham unutiladi, ishtaha ham ochiladi. Uning gapi toʻgʻri chiqdi. — S. Ahmad, Jimjitlik
Koʻzi ochilmoq q. koʻz Taʼzirimni yeganim shu boʻldiki, koʻzim ochildi, tushunib oldim. — S. Zunnunova, Olov
Ogʻzi ochilmoq Hayron boʻlmoq. Bir haftadan keyin qiz Jamolzodaning ustaxonasiga tashrif buyurdi. U Koʻkkoʻl tongini koʻrib, ogʻzi ochilib qoldi. Oʻshanda koʻrgani hozirgi polotnoning oldida oddiy ermak edi, xolos. — Yoshlik
Havo ochildi Havo bulutdan tozalandi. Osmonni qoplagan chang-toʻzon allaqachon gʻoyib boʻldi, havo charaqlab ochilib ketdi. — Sh. Rashidov, Boʻrondan kuchli