Народные книги

xalq kitoblari. Rivoya usulida nasr va nazmda (baʼzan faqat nasrda) yozilgan ishqiy-fantastik, tarixiy-afsonaviy yoki qahramonlik mazmunidagi asarlar. Xalq kitoblari termini Gʻarbiy Yevropada XVIII asrning oxiri va XIX asrning boshlarida dastlab nemis romantizmining namoyandasi Y. Gyorres tomonidan ishlatildi. Nemis romantik yozuvchilari xalq orasida aytilib yurgan Oʻrta asrlar romantik syujetlarni adabiy jihatdan qayta ishlab, xalq kitoblari nomi ostida nashr eta boshlaydilar. Ularning fikricha, bunday kitoblar xalqning milliy tuygʻularini qoʻzgʻaydi va mamlakat ozodligi uchun Napoleon Banapart armiyasiga qarshi qoʻzgʻatishga koʻmak beradi. Shunday qilib, xalq kitoblari termini ilmiy isteʼmolga kirib qoldi. Keyinchalik bu termin proletariat dohiysi Fridrix Engels tomonidan ham qoʻllanildi. Oʻzbek adabiyotshunosligida bu termin 40-yillardan boshlab qoʻllanila boshladi. Xalq kitoblari termini oʻz mohiyat eʼtibori bilan oʻzbek adabiyotshunosligida yozma holda tarqalgan qissa terminining sinonimi sifatida qoʻllaniladi.