ГРУНТОВАЯ ГЕОГИДРОДИНАМИЧЕСКАЯ СИСТЕМА

erkin yuza (sath)ga ega boʻlgan grunt suvi va unga yaqin boʻlgan turdagi yer osti suvlari sistemasi. Yer yuzasidan birinchi boʻlib joylashgan suv oʻtkazmaydigan qatlam ustidagi suvli gorizontda uchraydi. Quyidagi belgilari bilan geogidrodinamik sistema suvlaridan farqlanadi: 1) Suvlar asosan bosimsiz boʻlib, erkin yuzaga ega, atmosfera va yer ustki suvlari bilan bogʻliq (grunt suvlari yuzasi bosimi atmosfera bosimiga teng). 2) Grunt suvlarining taʼminlanish oblasti, asosan, tarqalish oblastiga mos keladi. Taʼminlanish atmosfera suvlari, yer ustki suvlari va kondensatsion suvlar hisobiga amalga oshadi. 3) Grunt suvlarining rejimi oʻziga xos. Rejim, yaʼni suvlarning zaxirasi, sathi, kimyoviy va bakterial tarkibi, fizik xossalarining vaqt davomida oʻzgarishi shu rayonning iqlimiy sharoitlariga, aeratsiya zonasida sodir boʻladigan fizik-kimyoviy va biokimyoviy jarayonlarga va insonning amaliy faoliyatiga (suv ombori, kanal, karer qurish; hudud zahini qochirish va sh.k.) bogʻliq. 4) Grunt suvlaridan xalq xoʻjaligida foydalanish qulay. Shu bilan bir qatorda, ularni sanoat, botqoq, kanalizatsiya va b. suvlar bilan ifloslanishi osonroq. Grunt suvlari sayyoramizning hamma joyida tarqalgan boʻlib, asosan, toʻrtlamchi davr yotqiziqlarida uchraydi. Daryo vodiylarining allyuvial, delyuvial, elyuvial, prolyuvial, flyuvioglyatsial va b. hosilalari bilan bogʻliq., Grunt geogidrodinamik sistemasi