ГИДРОГЕОЛОГИЧЕСКАЯ КАРТА

togʻ jinslarida yer osti suvlarining tarqalish sharoitini, ularning tuz va gaz tarkibini, jinsning (suvli gorizontning, suvli majmuaning) suvga moʻlligini va sh.k.larni xaritada ifodalash. Xarita mazmuni uning maqsadi va masshtabiga qarab belgilanadi. Neft-gaz gidrogeologiyasi amaliyotida har bir suvli gorizont va majmua uchun alohida G.x. tuziladi. Shuningdek har bir gorizont (majmua) uchun gidrokimyoviy, gidrodinamik, geotermik va sh.k.) xaritalar majmui tuzilib, ulardan neftgazlilikni bashoratlashda foydalaniladi. G.x.lar gidrogeologik syomka va razvedka ishlari natijalaridan foydalanib tuziladi. G.x.lar masshtabiga koʻra: obzor (1:1000000 va undan kichik), mayda masshtabli (1:500000—1:1000000), oʻrta masshtabli (1:100000 — 1:200000), yirik masshtabli (1:25000—1:50000), oʻta yirik masshtabli (1:25000 va undan yirik) turlarga boʻlinadi. Obzor xaritalar yirik geologik va geografik regionlarning (oʻlka, oblast, respublika yoki Yer shari) gidrogeologik sharoitlarini vujudga kelishi, yer osti suvlari tarqalishining asosiy qonuniyatlari va ularning ayrim elementlarini vaqt davomida oʻzgarishi toʻgʻrisida maʼlumot beradi. Mayda masshtabli G.x.lar u yoki bu hududning gidrogeologik sharoitlarini ifodalaydi. Ularda asosiy suvli majmualarning tarqalishi, yer osti suvlarining hosil boʻlishi va tavsifi ifodalanadi. Oʻrta masshtabli G.x.larda ayrim rayonlarning gidrogeologik sharoitlari oʻz aksini topadi. Xarita yer osti suvlaridan foydalanish va keyingi tadqiqot ishlarining birinchi navbatda bajariladigan uchastkalarini tanlash imkoniyatini beradi. Yirik masshtabli G.x. maydoni nisbatan kichik rayonlarning gidrogeologik sharoitlarini ifodalaydi. Bunday xaritalarning aniqlik darajasi yuqori boʻlganligi uchun ular asosida amaliy gidrogeologik masalalarni yechish, mufassal tadqiqotlarni rejalashtirish mumkin. Oʻta yirik masshtabli xaritalar uchastkalarning gidrogeologik sharoitlarini oʻzida toʻliq aks ettirib shaxta, karer, toʻgʻon, suv olish inshooti va boshqa inshootlarni loyihalash uchun asos boʻladi., Gidrogeologik xarita