Distix

ikkilik, distix. Antik poeziyada ikki misradan iborat boʻlgan band. Dastlab keng qoʻllanilgan ikkiliklar elegik distixlar boʻlib, ularning birinchi misrasi gekzametr, ikkinchisi pentametrlardan iborat boʻlgan. Xuddi shu maʼnoda distix termini faqat Gʻarb va rus sheʼriyatiga nisbatan qoʻllanilgan, xolos. Sharq sheʼriyatida ikki misradan iborat nisbiy tugallangan fikrga ega boʻlgan sheʼriy bandlar bayt (q. Bayt) deb atalgan. Bayt tarkibiga kiruvchi misralarning vazni bir xil boʻlgan. Bundan tashqari, ayrim poetik mustaqil janrlar borki, ular faqat ikki misradan iborat boʻladi. Masalan, fard janri bir baytdangina iborat. Hozir rus sheʼrshunosligida ham, oʻzbek sheʼrshunosligida ham distix termini kam qoʻllaniladi.