boʻylamoq

fl. 1. Oʻz boʻyi bilan oʻlchamoq.

Suvni boʻylamoq.

Oʻlan esga kelmaydi, oʻylasam; Qorasuv boʻy bermaydi, boʻylasam. — Oq olma, qizil olma

Yor vaʼdasi qiyin ekan, doʻstlarim, Daryoga tashladim, boʻyim boʻylamay. — Qoʻshiqlar

2. Boʻynini choʻzib qaramoq; intilmoq.

Hamsoyamiz Qulmat polvon bozorlab keldi. Devordan boʻylab, narx-navoni soʻradim. — T. Murod, Ot kishnagan oqshom

Qizchadan negadir darak yoʻq. Sadbarxon ayvondan oʻsha tomonga boʻylab qoʻyardi. — S. Zunnunova, Goʻdak hidi

Nigora dadasining yoniga borib, sekin gazetaga boʻyladi. — S. Zunnunova, Goʻdak hidi

Oʻzing yashayotgan chamanzordan turib, olisdagi, endi senga begona boʻstonga boʻylaysan. — Yoshlik

3. Suv, yoʻl va shu kabilarni yoqalab bormoq.

Yoʻl boʻylab bormoq. Ariq boʻylab yurmoq.

Yuring, oʻrtoq, oʻynaylik, daryolarni boʻylaylik. — Qoʻshiqlar

Dunyodagi eng maroqli sayr bolalik yillarini oʻtkazgan koʻchalar boʻylab sayr etish boʻlsa kerak. — S. Siyoyev, Otliq ayol

Yoʻlchi savatni kaftida tutib, Kalkovuz suvini boʻylab, Taxtapul guzariga chiqdi. — Oybek, Tanlangan asarlar