Aylanma burgʻilashda

burgʻilash eritmasi yoki suv doloto ishlab turgan vaqtda quduq ichiga burgʻilash nasoslari yordamida haydaladi. Eritma minorani oʻng tomonida joylashgan vertikal quvurga, soʻng egiluvchan burgʻilash shlangi, vertlyug, boshqaruvchi quvur va BQB orqali haydaladi. Doloto teshigidan chiqib, quduq tubiga urilgan suyuqlik uni sovutadi va maydalangan jinslar (shlam)ni quduq devori bilan BQB oraligʻidagi halqasimon boʻshliq orqali yer yuzasiga olib chiqadi. Chiqqan eritma nov sistemasida va tozalash mexanizmlarida tozalanib, burgʻilash nasosining sigʻimiga kelib tushadi va yana quduqqa haydaladi. Quduq chuqurlashgan sari polispast sistemasiga osib qoʻyilgan kronblok, tal bloki, kryuk va tal qanotidan tarkib topgan BQB quduqqa tushirib boriladi. Boshqaruvchi quvur rotordan butunlay oʻtgandan soʻng, lebedka yordamida BQB yuqoriga (boshqaruvchi quvur uzunligicha) koʻtariladi va elevator yoki rotor stolidagi ponalar yordamida qotirilib osib qoʻyiladi. Soʻng boshqaruvchi quvur burab olinib chuqurligi uning uzunligiga teng qilib minoraning oʻng tomonida qazilgan va quvur bilan jihozlangan qiya shurfga tushiriladi. Keyin BQBga navbatdagi (uzunligi 12 m ga yaqin) burgʻilash quvuri ulanadi, elevator va ponalar olinib ulangan quvur uzunligicha quduq ichiga tushiriladi. Shurfdan boshqaruvchi quvurni vertlyug bilan birga koʻtarib, ularni BQBga burab mahkamlanadi, uni elevator va ponalardan boʻshatib dolotoni quduq tubiga yetkaziladi va burgʻilash davom ettiriladi. Tishlari yemirilgan dolotani almashtirish uchun quduqdan BQB butunlay chiqarib olinadi va yangi doloto bilan qayta tushiriladi. Lebedka barabani aylanganda tal kanat unga oʻraladi yoki boʻshaladi, oʻralganda tal bloki va kryuk koʻtariladi va aksincha. BQBni koʻtarishda ular ikki yoki uch quvur uzunligidagi svechalarga boʻlinadi, svecha uzunligi minora balandligiga qarab belgilanadi. Minora balandligi 41 m boʻlganda svecha uzunligi 24—25 m, 53 m boʻlganda — 36—37 m boʻladi. Burab olingan svechalar minora fonarida, vertikalga nisbatan 2—3° ga ogʻdirib taxlanadi. BQB quduqqa teskari tartibda tushiriladi. Neft va gaz quduqlarini burgʻilashda tub dvigatellaridan turbobur va elektrbur ishlatiladi. Turbobur bilan burgʻilashda BQB dan pastga qarab harakatlanayotgan burgʻilash eritmasi oqimining gidravlik energiyasi mexanik energiyaga aylanadi va doloto bilan birikkan oʻqni aylantiradi. Elektrbur dvigateliga tok kabel orqali yuboriladi, BQB ga qotirilgan dvigatel ishga tushib dolotani aylantiradi. Quduq ogʻzidagi yumshoq jinslarni yuvilishdan saqlash uchun dastlab mexanizm yordamida yoki qoʻlda 4—10 m li shurf qaziladi va unga yoʻnaltiruvchi deb nomlanuvchi mustahkamlovchi quvur tushiriladi. Mustahkamlovchi quvur va shurf oraligʻidagi boʻshliq sement qorishma bilan toʻldiriladi natijada quduq ogʻzi qotadi. Yoʻnaltiruvchi quvurning yuqori qismidan darcha ochiladi, B.j.da eritma shu joydan aylanish sistemasiga oqib chiqadi. B.j.da 150—400 m chuqurlikda yumshoq, darzlangan va sergʻovak jinslar ochiladi, ular quduq qazishni murakkablashtirishi mumkin. Shu sababli, bunday qatlamlar quduqqa MQBni tushirib ajratiladi. Quduq devori va MQB oraligʻiga sement qorishmasi haydaladi. Bunday MQB konduktor deb nomlanadi. Konduktor oʻrnatilgandan soʻng quduqni loyihada koʻrsatilgan chuqurlikkacha yoki ushbu quduq bilan ishlatilmaydigan gorizontlargacha qazish davom ettiriladi. Bunda turli murakkabliklar kelib chiqishi mumkin. Bunday hollarda quduqqa ikkinchi MQBni tushirish va sementlash kerak boʻladi va ular oraliq MQB deb ataladi. Burgʻilash sharoitlari murakkab boʻlganda