fl. 1. Maʼlum muddat umr koʻrmoq; hayot kechirmoq; tirik yurmoq.
Koʻp yashagan bilmas, Koʻpni koʻrgan bilar. — Maqol
Mallaxondan beri yashayman, bolam, ne-ne xonlarning, ne-ne beklarning otlarini koʻrganman. Ne-ne otlar oʻz qoʻlimdan ham oʻtgan. — Oybek, Tanlangan asarlar
Gʻulomjon bu keksa dunyoda juda kam yashagan boʻlsa ham, boshidan juda koʻp uqubatlar kechirdi. — M. Ismoiliy, Fargʻona tong otguncha
2. Biror yoʻsinda hayot kechirmoq, biror tarzda tirikchilik oʻtkazmoq; umrguzaronlik qilmoq.
Azobda yashamoq. Yolgʻiz yashamoq. Ota-onasiz yashamoq. Rohatlanib yashamoq. Tutqunlikda yashamoq. Qul boʻlib yashamoq. Tiz choʻkib yashaguncha, tik turib oʻlgan yaxshi. — Maqol
Masalan, togʻlardagi ohular, oʻrmondagi toʻtilar, chamandagi bulbullar ham yolgʻiz emas, juft yashaydilar. — A. Qodiriy, Mehrobdan chayon
Sodiqlar oʻz ovqatlarini ham oʻtkazolmagan holda faqirlikda yashab, yil sayin menga oz-moz yerlaridan sotib, tiriklik qilar edilar. — A. Qodiriy, Oʻtgan kunlar
3. Hayotini biror joyda oʻtkazmoq; biror joyda istiqomat qilmoq, turmoq.
Shaharda yashamoq. Qishloqda yashamoq. Musofirchilikda yashamoq. Chet elda yashamoq.
Mana hozir uch kundan beri bu yerda, opasining bogʻida yashaydi. — Oybek, Tanlangan asarlar
Shu qishloqlarda, qoʻrgʻonchalarda odam yashaganligi, xursandchilik, toʻy-tomosha qilganligi uzoq oʻtmish toʻgʻrisidagi ertakday tuyilar edi. — A. Qahhor, Oltin yulduz
[Abdishukur] Bu yerda bir tatar savdogarning xizmatiga oʻtib, Qozonga ketdi. Qozonda uch yil yashadi. — Oybek, Tanlangan asarlar
4. Biror kimsa bilan bir joyda birga (yaqini, qarindoshi, eri yoki xotini sifatida) istiqomat qilmoq.
Men bilan yashaydigan kampir bozorchi xotin edi. — Oybek, Tanlangan asarlar
Biz ikkov yoshlikdan birga yashab kelamiz, oramizda maxfiy sirlarimiz yoʻq. — A. Qodiriy, Mehrobdan chayon
Mana, uch oyga yaqindir, Nurinisa oʻzi koʻrmagan, bilmagan, hatto ismini toʻy arafasida kelinoyisidan eshitgan eri bilan yashaydi. — Oybek, Tanlangan asarlar
5. koʻchma Mavjud boʻlib turmoq, bor boʻlmoq, saqlanmoq.
Mangu yashar shuhratimiz-shonimiz.
Bir necha yuz yillardan beri yashab, favqulodda zoʻrayib ketgan Xoʻja Maʼoz mozorining chakalagi bu qorongʻilikka bir manba kabi edi. — A. Qodiriy, Oʻtgan kunlar
Gʻazab ichra oʻrtab insonni, Qirgʻogʻiga toʻkilgan qonni Yuvolmaydi! Yashaydi bu qon, Unutilmas bu kurash, qurbon. — E. Rahim