Қидирув

сфт. 1. Этли, тўладан келган; тўла.

Семиз одам.

Скамейкада ёш болали аёлнинг чап ёнида ўтирган семиз киши бепарво газета ўқирди. — Ў. Ҳошимов, Қалбингга қулоқ сол

Саккиз меҳмон ичида иккиси бениҳоят семиз эди. — Ойбек, Танланган асарлар

[Отабек:] Нега Зайнаб семиз-у, Кумуш озғин?! — А. Қодирий, Ўтган кунлар

2. Яхши боқилган, этли; бўрдоқи; вазндор; ёғ босган.

Семиз қўй. Семиз гўшт.

Сувонжон августнинг охирларида ўрмон хўжалиги пунктига келди. Унинг қўлида тўртта семиз каклиги бор эди. — С. Анорбоев, Оқсой

Шарофатхон бир катта косада семиз қўй гўштидан пиширилган шўрвадан келтирди. — Ойбек, Танланган асарлар

3. қ. х. Ўсимлик учун фойдали моддаларга бой, серҳосил (ер ҳақида).

Тайёр, семиз ер бўлса, 50 сентнердан ҳосил олиш унча қийин эмас. — Газетадан

Тупроқ — семиз, сув — яқин, ҳавоси очиқ, Қуёш эса йил бўйи бу ерга ошиқ. — М. Шайхзода

4. с. т. Ёʻғон, қалин, қаппайган; энли.

Семиз китоб.

Кечқурун гузарга кириб туринг, кўрасиз. Семиз-семиз сумка кўтарган хотинлар ўтаверади. — С. Сиёев, Отлиқ аёл

Эни бир ярим, бўйи икки қарич чамаси келадиган газетанинг устига қора, семиз ҳарфлар билан: Туркистон вилоятининг газети деб ёзилган эди. — М. Исмоилий, Фарғона тонг отгунча

Олдинда серсавлат Мойлихон ака, ортида жигарранг дипломат ва семиз қоғоз папка кўтарган Ғойибжон пилдираб келар эди. — Н. Аминов, Қалтис хато

от 1. Олий ёки ўрта махсус ўқув юртларида талабаларнинг ўқув режасида белгиланган мавзуларни қанчалик ўзлаштирганликларини аниқлаш, уларнинг мустақиллигини ошириш мақсадида ўқитувчи раҳбарлигида ўтказиладиган машғулот.

Семинар мавзулари тегишли профессор-ўқитувчилар томонидан тузилиб, кафедра мажлисида тасдиқланади. — Ўзме

2. Бирор илмий муассасада, ташкилотда ходимлар малакасини ошириш, илмий ютуқлар ва тажрибани ўрганиш, айирбошлаш ва тарқатиш учун ўтказиладиган йиғилиш.

Врачлар семинари,

Тошкентда яқинда катта ёзувчилар учун алоҳида, ёш ёзувчилар учун алоҳида семинарлар ташкил этилди. — Н. Сафаров. Оловли излар

сфт. Семитларга тегишли, алоқадор.

от бот. Семизўтларга мансуб, тоғли жойларда ўсадиган бир йиллик ўсимлик.

от Суғориладиган ерларда ўсадиган, поясида оқ суцимон модда бўлган бир йиллик бегона ўт.

фл. 1. Эт олмоқ, вазни кўпаймоқ; ёʻғонлашмоқ; тўлишмоқ.

Бир терининг ичида қўй неча марта семириб, неча марта озади. — Мақол

Чумчуқ семирса, ботмон келмас. — Мақол

Камбағал уруғ-аймоқ, қўни-қўшнилар, тўйда, азада семирадиган юримсак аёллар қоронғида туртиниб, пиёда жўнашди. — Ойбек, Танланган асарлар

2. кўчма с. т. Жуда хурсанд бўлмоқ; кайфияти кўтарилмоқ.

Бу хушхабарни эшитиб, Абдумалик яна ҳам семирадиган бўлди. — Газетадан