fl. 1. Balandligi nisbatan kamayib qolmoq, choʻkmoq, choʻkib qolmoq.
Yer zichlanib, ancha pasaydi.
1989-yil Orol dengizining sathi yana bir metrga pasaydi. — Fan va turmush
Kanalda suv pasaydi, qishloq koʻchalari, paxtazor paykallari selgib qoldi. — Oʻ. Hoshimov, Qalbingga quloq sol
2. Kamaymoq, kuchsizlanmoq, qaytmoq (hodisalarning kuchi, shiddati, darajasi, miqdori va shu kabilar haqida).
Ogʻrigʻim pasaydi. Quyosh harorati hali pasaygani yoʻq. Shamol ancha pasaydi. Bolaning issigʻi pasaymadi. Radioning ovozi pasayib qoldi.
Yoʻldoshevning yigʻisi borgan sari pasayib, nihoyat xoʻrsina-xoʻrsina jim boʻldi. — N. Safarov, Jangovar sahifalar
Uning vujudini qamrab olgan oʻt asta-sekin pasayib, koʻngli tobora soviy boshladi. — H. Gʻulom, Mashʼal
3. Yuqori amaldan pastroq amalga tushib qolmoq.
Martabasi pasaydi.
4. koʻchma Kibr-u havosi yoʻqolib, shaxti qaytib, epaqaga kelib qolmoq, hovuridan tushmoq.
Bir oz pasaying. U ancha pasayib qoldi.
- Popugi pasaymoq Shashtidan qaytmoq, hovuridan tushmoq, boʻshashib qolmoq. Daʼvogarning popugi pasaydi.