Қидирув

от 1. Ўрганиш бўлиб қолган ҳаракат, қилиқ.

Яхши одат. Ёмон одат. Сенинг одатинг менга маълум. Бу отнинг тишлайдиган одати бор. Одат қилмоқ.

Тарки одат — амри маҳол. — Мақол

Ҳасаналининг ортиқча берилиб ўйлаган кезда соқолини қайириб тишлайдиган бир одати бўлиб, ҳозир ҳам соқолини ямлаш билан машғул эди. — А. Қодирий, Ўтган кунлар

Ҳар қандай ерга сўрамай-нетмай кириб боравериш оқсоқолга одат эди. — П. Турсун, Ўқитувчи

2. Ота-бободан қолиб келаётган ва кишиларга сингиб кетган ёки янгидан сингиб бораётган расм-русум, удум, тартиб.

Эски одат.

Йилни ўн икки ҳайвон номи билан аташ одати ва 12 йиллик давр билан вақт ҳисоблаш анъанасига Қадимги Хитойда асос солинган. — Фан ва турмуш

Эрталаб, одат бўйича, Нури тўр рўмол ёпиниб, бешикдаги боладан то кексаларга қадар — ҳаммага салом қилар экан. — Ойбек, Танланган асарлар

Ҳатто шундай бир одат борки, кимдир вафот қилса, унинг тобутини кўтариш олдидан, албатта, кўпчилик ўртасида, марҳумнинг олган-бергани борми, деб сўралади. — Шукрулло, Сайланма

рвш. кт. Одат бўйича, одатдагича, ҳар вақтдагидек.

Одатан кун қиёмга етганда, завод гудок берар эди.

рвш. Одат бўйича, одатга кўра.

Одатда кичиклар катталарга салом беради.

Одатда эр-хотин орасида гап қочганда, бегона ёнида бўлса, данакдек жанжал ёнғоқдек бўлиб кетади. — С. Аҳмад, Уфқ

Одатда ишчанлик қобилиятини қайта тиклаш учун 3 соат дам олиш етарли бўлади. — Фан ва турмуш

сфт. Одат бўлиб қолган, одат ҳукмига, кирган, одатда бўладиган; одатдаги.

Одатий нарса. Одатий байрам.

Ҳасанали дастурхон ёзиб, қумғон киргизди. Одатий такаллуфлар билан дастурхон ва чойга қаради. — А. Қодирий, Ўтган кунлар

Бадиий фикрнинг ўзи одатий фикрнинг қайта қурилишидир. — Газетадан

рвш. 1. Одатда бўладиган, одат, ўрганиш бўлиб қолган, одат ҳукмига кириб қолган; одатий.

Одатдаги иш. Одатдаги муомала.

У ҳужрага кириб, яна одатдаги жойига ўлтирди. — А. Қаҳҳор, Сароб

Мавлуда қизчасини кўтариб кириб келганда, Марзия хола унинг одатдаги келиши деб ўйлаб, хушнуд қарши олди. — С. Зуннунова, Кўк чироқлар

2. Қоида, қонун кўринишидаги; доимий.

Гап бўлакларининг деярли ҳаммаси одатдаги ўрнини ўзгартириб, турғун инверсион ҳолатда бўла олади. — ЎТА

фл. Одат қилмоқ, бирор ишга, нарсага ўрганиб қолмоқ.

Эрталаб барвақт туришга одатландим.

Мирзакаримбой, савдогар назокатиданми ёки одатланганиданми, нонни жуда майда ушатган эди. — Ойбек, Танланган асарлар