rvsh. 1. Xabardor boʻlmagan, voqif boʻlmagan, xabari yoʻq; xabarsiz.
Bexabar qolmoq.
Hayotxon bundan bexabar edi. — M. Ismoiliy, Fargʻona tong otguncha
Uchqun oyisining boshiga tushgan musibatdan bexabar. — H. Gʻulom, Mashʼal
Gʻam bilan sargʻaydi guldayin diydor, Bu ishlardan menday joʻrang bexabar. — Malikayi ayyor
2. Maʼlumoti yoʻq, bilimi yoʻq.
Adabiyotdan bexabar kishi,
baʼzan biz oʻz ijodimizdan toʻrtta-beshta kitob oʻqigan, dunyo adabiyotidan bexabar, mahalla saviyasidagi ogʻaynilarimizning didi bilan quvonamiz. — Shukrullo, Saylanma
3. Duch kelinadigan narsa, voqea-hodisadan xabari boʻlmasdan turib, xabari boʻlmagan holda, bilmasdan, birdan.
Chiqib qoldi oʻzi bexabar, Tashlagandi qiya shol roʻmol. — Mirtemir, Asarlar
Banda bexato boʻlmas, boyvachcha, bexabar xonadoningizga kirib qolibman! — A. Qodiriy, Kichik asarlar
- Xudo(dan) bexabar Xudo bor deb oʻylamaydigan; xudodan qoʻrqmaydigan, insofsiz. Qarisang ham, sen shumlikni oʻylaysan, Xudodan bexabar, qoʻygin, yotaylik. — Nurali