Қидирув

от 1. Муайян кўникма, маҳорат талаб қиладиган, тирикчиликнинг асосий манбаи ҳисобланувчи иш, машғулот; касб.

Ҳунар, ҳунардан унар. — Мақол

Йигит кишига етмиш ҳунар оз. — Мақол

Онам ҳам ўқитувчи, Бир ҳунари — тўқувчи, Менчи аъло ўқувчи — Қ. Муҳаммадий.

Йигитнинг қўлида гулдай ҳунари бор. — Ойбек, Танланган асарлар

Отасининг ҳунарини яхши эгаллаб олган бу йигитча учун қишлоқда иш кўп эди. — С. Аҳмад, Ҳукм

— Бошқа бир ҳунарга берсак бўлмайдими? — дадамнинг сартарошликка ҳеч кўнгиллари ёʻқ эди. — Э. Раимов, Ажаб қишлоқ

2. Бирор ишдаги маҳорат, санъат; моҳирлик, усталик талаб этувчи иш, хатти-ҳаракат

Ҳунарининг борин унда билдирган, Кунгурасин пўлатдан қип эндирган. — Муродхон

Конферансе иккинчи номерда хоҳлаган киши хоҳлаган ҳунарини кўрсатиши мумкин, деб ҳаммани кулдирди — А. Қаҳҳор, Танланган асарлар

Чекиниш учун ҳам ҳунар керак бу ҳам санъат талаб қилади — Ойбек, Қуёш қораймас

3. Одат тусидаги иш, ҳаракат.

Аммо эски ҳунарингизни қилиб, отамга чақсангиз, мендан шафқат кутманг! Мирмуҳсин, — Меъмор

Уйда қовоғини осилтириб, кўчада бегона аёлни кўрганда илжаядиган, тиржаядиган ҳунарга ўрганди. — Муштум

Кесатиқ ҳунаринг эсингдан чиқдими, деб турган эдим. Ҳарнечук ёдингда экан — А. Қодирий, Меҳробдан чаён

4. Бўлмағур, келишмаган хатти-ҳаракат, қилиқ, одат.

Абдишукур, овозни бунчалик бошқача қилишни кимдан ўргандинг? Ҳунарингга балли-е — Ойбек, Танланган асарлар

Ғаройиб кучдан шер бўлиб кетган болалар тарбиячиларини кўриб хижолат тортиш, изза бўлиш ўрнига ғилайлашган кўзларини сузиб, ўз ҳунарларини давом эттираверишди. — Газетадан

Ни к чему хранить мне в тайне всех ремесел мастерство. Не возьму же я в могилу все премудрости его. (А. Навои.)

сфт. Ҳунари бор, ҳунар эгаси, ҳунар ўрганган.

Ҳунарли эр хор бўлмас. — Мақол

Лекин ўзлари тўрт оғани эдилар, тўртови ҳам кал эди, бариси ҳам ҳунарли эди. — Равшан

Бу орзуга эришмоқ учун астойдил ишлаб, ҳунарли бўлиб олиш керак. — М. Осим, Тилсиз гувоҳ

ўзбекчамаҳоратли, ҳунарли, моҳиррусчаискусный, ловкийинглизчаskillful

Baqa kör kitabni bu tergän kiši, hunarlïy er ermiš kišilär bašï Боқиб кўргин, бу китобни ёзган киши, маҳоратли киши эмиш, кишилар боши

Baqa kör kitabni bu tergän kiši, hunarlïy er ermiš kišilär bašï Смотри, человек, сочинивший (букв. собравший) эту книгу, идет во главе людей, он – искусный муж

Baqa kör kitabni bu tergän kiši, hunarlïy er ermiš kišilär bašï Look the person who wrote this book is the head of people, he is a skillful man

сфт. Бирор ҳунарни эгалламаган, ҳунари ёʻқ.

Донишманд унга: — Ҳунарсиз кишининг қўли боғлиқ, — дебди. — И. Раҳим, Чин муҳаббат

Яхши бир меъмор ҳунарсиз асилзоданинг юзтасидан афзал эмасми? — П. Қодиров, Юлдузли тунлар

Ҳар ҳунарнинг бир гашти бор, Ҳунарсизнинг не гашти бор? — Қ. Муҳаммадий

от 1. Уйида ёки ўз дўконида маҳсулот ишлаб чиқариш билан шуғулланувчи касб-ҳунар эгаси; косиб.

Давр тақозоси билан ҳунармандчиликнинг янги-янги турлари вужудга келди. Ҳунармандлар ҳам турли маҳсулотлар тайёрлаш бўйича ихтисослаша бордилар. — Ўзме.

Расталари турли касбдаги ҳунармандлар — темирчилар, мис чўкичлаб, нақшли баркаш, чойдиш, чилобчин, хилма-хил буюмлар ясовчи мисгарлар тақачилар, кулол, баққол ва косиблар билан обод эди. — К. Яшин, Ҳамза

Йиғилди турли косиб, турли деҳқон, Ҳунарманд-у шакарпаз, турли боғбон. — Ҳабибий

2. Ўз иш-касбининг моҳир устаси.

бу йигитнинг келишган ва ҳаракатчан қомати одамларнинг кўз олдига келиб туради. — Кўп ҳунарманд йигит экан, азамат! — дейдилар. — П. Турсун, Ўқитувчи

Турли хил рангларнинг мутаносиблиги, олтин қўлли ҳунармандлар сеҳрли жозиба бағишлаган шиша буюмларни кўриб, кўзингиз тўймайди. — Газетадан.