Поиск

sft. 1. Berk, berkitilgan, yopiq; qulflangan.

Hamma mehmonxonalarning oyna-band naqshli, boʻyoqli eshiklari va derazalari bekik, qalin pardalar bilan qoplangan. — Oybek, Tanlangan asarlar

Bobur bekik va dim qoʻrgʻondan koʻra, uzoqdagi daraxtzorlarni, keng, ochiq joylarni afzal koʻrardi. — P. Qodirov, Yulduzli tunlar

2. Toʻsilgan, toʻsiq.

Bekik yoʻl. Daryo bekik edi.

sft. kam qoʻll. q. Kimsasiz.

fl. 1. Yopiq holatga kelmoq; mahkamlanmoq, qopqoqlanmoq.

Sandiq bekildi. Eshik yaxshi bekilmadi. Xumning ogʻzi bekildi.

Lyuk bekilgach, laylakqor tindi, lekin quyuq tumanday chang dastgohda muallaq osilib qoldi. — K. Yashin, Hamza

2. Toʻsilib yoki taqiqlanib, oʻtib boʻlmaydigan holatga kelmoq; yopilmoq.

Chegara bekildi. Yoʻl bekildi. Joʻmrak bekildi.

Otaxoʻja aka uning [Abdubilolning] yoniga oʻtdi. Endi chiqib ketadigan yoʻl bekilgan edi. — S. Yunusov, Kutilmagan xazina

3. Panalanib, toʻsilib, koʻrinmay qolmoq.

Gullar oʻsib, devorning aybi bekildi.

4. koʻchma Taqiqlanishi, tugatilishi yoki belgilangan vazifa, ishni bajarib boʻlganligi sababli faoliyatdan toʻxtamoq, yopilmoq.

Majlis bekildi. Koʻrgazma bekildi. Institut bekildi.

5. Yigʻilib yoki bukilib yopilmoq.

Soyabon bekildi.

fl. Oʻzini panaga olmoq; yashirinmoq.

Oftobdan bekinmoq. Uyga bekinmoq.

Sherbek ichkariga sirgʻanib tushdi-da, devor tagiga bekina qoldi. — S. Anorboyev, Oqsoy

Tushga kelib, oftob bulutlar ortiga bekindi. — Gazetadan

fl. 1. Yopiq (berk) holga keltirmoq; ochiq yoki ochilib-yopiladigan joyni mahkamlamoq, yopmoq.

Sandiqni bekitmoq. Eshikni bekitmoq. Xumning ogʻzini bekitmoq. Teshik-yoriqlarni bekitmoq.

Eshikni bekitib, don solinadigan eski xampa ostiga engashdi. N. Aminov, Suvarak.

U qutini bekitib turgan silliq mis parchasiga qaradi. P. Qodirov, Yulduzli tunlar.

2. Ustini, atrofini oʻrab (qoplab, toʻsib) olmoq; koʻrinmaydigan qilib yopmoq, panalamoq.

Yukni brezent bilan bekitmoq. Yuzni bekitmoq. Bulutlar oyni bekitib qoʻydi.

Zebo yana qizarib ketdi. Chakka sochlarini tuzatish bahonasi bilan koʻzini bekitdi. Shuhrat, — Shinelli yillar

Choʻpon meni chakmoni bilan bekitib: — Suyunchisiga nima berasiz? — deb soʻrabdi. — Sh. Xolmirzayev, Ogʻir tosh koʻchsa

Rahima Kamolning mushtidan yuzini bekitib, muk tushib oldi. — S. Yunusov, Kutilmagan xazina

3. Kimsa bilmaydigan qilib koʻzdan yoʻqotmoq; yashirmoq.

Bola oʻyinchoqni bekitdi.

-Xanjaringizni ham bekitib qoʻying! — dedi Zulfiqor. — Mirmuhsin, Meʼmor

Boʻri yugurib kelib, cholga: — Ota, bir mergan quvib kelayotibdi, meni bekitib qoʻying, — debdi. — Chalpak yoqqan kuni

4. Sir tutmoq; saqlamoq, yashirmoq.

Men seni yaxshi bilaman, ukajon toʻgʻri soʻz, vijdonli bolasan. Ammo Raimning sirini bila turib, bekitganingga hayronman. — H. Nazir, Soʻnmas chaqmoqlar

Nahotki qaynonasidan bekitib kiyinsa, nahotki kampirning gaplari rost boʻlsa? — Mushtum

5. Toʻsib yoki taqiqlab oʻtkazmay qoʻymoq, yopmoq; mahkamlab toʻxtatmoq.

Yoʻlni bekitmoq. Chegarani bekitmoq. Suvni bekitmoq. Gazni bekitmoq.

6. koʻchma Ishi, faoliyatini toʻxtatmoq yoki tamom qilmoq.

Koʻrgazmani bekitmoq. Savdoni bekitmoq.

Eski shahar ijroqoʻmi Mozorxon, Oqmachit mahallalaridagi eski maktablarni bekitdi. — Gazetadan

7. Bukib yoki yopib, yigʻiq holatga keltirmoq (ochilib-yopiladigan, buklanadigan narsalar haqida).

Soyabonni bekitmoq. Qalamtaroshni bekitmoq. Kitobni bekitmoq.

fl. Bekitmoq feʼlining majhul nisbati.