fl. 1. Oshmoq 1-7, 9-10 feʼllarining orttirma nisbati.
Oylikni oshirmoq. Tovuqlar sonini oshirmoq. Hosilni oshirmoq.
Daryo suvini bahor toshirar, odam qadrini mehnat oshirar. — Maqol
Knyaz suv pulini uch baravar oshirib yuboribdi. — A. Qahhor, Qoʻshchinor chiroqlari
Odamlarning ruhini koʻtarish, hosil-dorlikni oshirish kerak. — T. Ashurov, Oq ot
Mavjud korxonalarning ishlab chiqarish quvvatini oshirish bilan yangi obyektlar ham barpo etildi. — Fan va turmush
2. s. t. Birovga berib, oʻtkazib yubormoq; pullamoq, sotmoq. Jinoyat ishini koptoksimon tergovdan tergovga, suddan sudga oshiraverdi Gazetadan.
Agar., qutichani biror yerga oshirgan boʻlsang, hali ham yaxshilikcha oʻrniga qaytar, — dedi Hoji bobo Shum bolaga. — Gʻ. Gʻulom, Shum bola
[Marasul:] Xumorxon shunaqa narsalarga oʻch, oʻshanga oshiramiz. — A. Qahhor, Ogʻriq tishlar
3. Boʻrttirmoq, mubolagʻa qilmoq.
Maqtovini oshirmoq.
— Yoʻq, siz juda oshirib yubordingiz, Sayfullaxoʻja, — dedi boshini chayqab, — sizlarnikida kuniga uch-toʻrt mahal emas, bir mahalgina issiq ovqat yer edim. — P. Tursun, Oʻqituvchi
Sidorov oshirib yuborganini tushundi. — E. Samandar, Daryosini yoʻqotgan qirgʻoq
4. Maʼlum chegara yoki balandlikdan oʻtkazmoq.
Bu safar Habibullo polvon Kullalik polvonni yelkasi uzra oshirib, otib tashladi. — T. Ashurov, Oq ot
Toʻrt-besh metr balandga yetganda, inqillab, qanordagi tuproqning yarmini yelkasidan oshirib toʻkadi-da, qolganini doʻngga opchiqib ketadi. — S. Ahmad, Ufq
- Boshidan (yoki oʻzidan, yelkasidan) oshirmoq Masʼuliyatni birovga yuklab, oʻzini tashvishdan, ishdan xoli qilmoq.
- Oshirmay-toshirmay Qanday boʻlsa oʻsha holicha; boʻrttirmay, mubolagʻa qilmay. Kunlar oʻtaverdi. Umid aslo pinagini buzmadi. Komissiyaga bor haqiqat gapni oshirmay-toshirmay aytdi. — Mirmuhsin, Umid
- Amalga oshirmoq Oʻylagan rejasini amalga oshirmoq.