от 1. Ўзини танитмаслик ёки ҳимоя қилиш учун юзга тутиладиган, кийиладиган нарса; маска.
Карнавал ниқоби.
Унгур қазиётган боёқишларнинг юзлари чақмоқдан яра, ғурра бўлиб кетибди, шуни тутиб олиб ишлашсин, деб қилдим, — деди Қудрат, темир ниқобни чолларга узатиб. — М. Исмоилий, Фарғона тонг отгунча.
Эй моҳтоб, очгил ниқоб, Карнавалда янграр соз. — Т. Тўла
2. Махсус тикилган жилд, қоплама.
Уч деразали катта кабинет, баланд суянчиқли стулларга, юмшоқ креслоларга оқ ниқоб ёпилган. — П. Қодиров, Уч юлдуз
3. кўчма Ҳақиқатни, ҳақиқий ҳол, қиёфа ва шу кабиларни пардаловчи, яширувчи нарса, восита.
Ниқобини олмоқ.
Ҳа, узоқ йиллар мобайнида [Эркиннинг отаси] болшевик ниқобида юрган. — Т. Малик, Иблис девори
[Мутавалли] Юзидаги ғазаб ва норозилик аломатларини жўрттага ёʻқотиб, ясама шодлик ниқобини кийиб олибди. — С. Айний, Эсдаликлар
Бу ҳол [Ҳомиднинг] сирини очар, юзидаги ниқобини олишга, рақиблар ила юзма-юз келишга мажбур этар эди. — А. Қодирий, Ўтган кунлар