yonmoq

fl. 1. Oʻt olmoq; oʻtda kuymoq.

Toʻqayga oʻt tushsa, hoʻl-u quruq baravar yonadi. — Maqol

Quruq oʻtin bir zumda lovullab yonib ketdi. — M. Ismoiliy, Fargʻona tong otguncha

Chayla qamishlari allaqachon yonib bitib, yogʻochlarigina qora koʻmir boʻlib, chars-churs qilib tutab yotardi. — N. Fozilov, Diydor

2. Yolqinlanib, nur berib turmoq.

Saroyning toʻrida boshqalarga qaraganda koʻrkamroq bir hujra bu hujrada sham yonadi. — A. Qodiriy, Oʻtgan kunlar

Haqiqatdan u kishining [Zokir Oʻrinovichning] hovlisida chiroq yongan edi. — Sh. Xolmirzayev, Yoʻllar, yoʻldoshlar

3. Nur, shuʼla sochmoq, porlamoq.

Koʻkda, daraxtlar ustida gʻuj-gʻuj yulduzlar yonadi. — Oybek, Tanlangan asarlar

Archa turar oʻrtada yonib, Oqmoqdadir har yon shuʼla-nur. — Gʻayratiy

4. Tovlanmoq, jilvalanmoq.

Gilam choʻgʻdek yonadi.

Koʻylak yengi tirsakka qadar shimarilgan, [qizning]

tiqmachoqday bilaklarida ilon boshli oltin bilaguzuklar yonadi. — Oybek, Tanlangan asarlar

5. Ortiq darajada issigʻi, harorati oshmoq, qizimoq.

— Uh, badanim yonib boradi — dedi Gulnor. — A. Muxtor, Opa-singillar

U yonogʻini onasining yonib turgan oʻtli yonogʻiga surtib, siniq tovush bilan pichirladi. — M. Ismoiliy, Fargʻona tong otguncha

6. Ortiq darajada qizimoq.

Quyosh tik kelgan. Havo lovullab yonadi. — Oybek, Tanlangan asarlar

Kishini holdan toydiradigan saratonning havo yongan kunlarida har qanday tirik jon oʻzini panaga uradi. — Sharq yulduzi

U [Rahim Saidov] pastga tushdi. Kun tikkaga kelgan, koʻcha yonardi. — Oʻ. Umarbekov, Yoz yomgʻiri

7. koʻchma Butun vujudi bilan berilmoq, astoydil harakat qilmoq; qaygʻurmoq.

Yoʻlchi yozda yonib, chang-tuproq yalab, qishda qor-muz kechib, butun mahrumiyatlarga, butun ogʻirliklarga qaramasdan, jonkashlik bilan ishladi. — Oybek, Tanlangan asarlar

Bu ashulani ham yonib, joʻshib aytdi. — M. Ismoiliy, Fargʻona tong otguncha

Onaman-u onaman, Bolam uchun yonaman. — Qoʻshiqlar

8. koʻchma Tutaqmoq, jahli chiqmoq; asabiylashib ketmoq.

Siz onamdan xafa boʻlmang, uning odatini bilasiz-ku, bir yonib, bir oʻchaveradi [dedi Rayhon]. — S. Anorboyev, Oqsoy

Olimjon yotigʻi bilan soʻzlagan boʻlsa-da, rais yonib ketdi. — H. Nazir, Qanotlar

9. koʻchma Kuchaymoq, avj olmoq; alangalanmoq.

Begʻubor tong kabi qalbingda Vatan ishqi, xalq mehri yonar. — Gʻayratiy

Hozir Xalilovning nafrati yonib turibdi. — I. Rahim, Ixlos

10. Sabrsizlik bilan kutmoq, oshiqmoq.

Navoiy Hirotga kirishi bilan uning maxsus farmon olib kelganligi butun shaharga yashindek tarqaldi. Hamma uni tezroq eshitish orzusi bilan yondi. — Oybek, Navoiy