Единство времени, места и действия

Antik drama yoki tragediya va unga taqlidan yaratilgan klassitsizmning dramatik asarlari talablaridan biri. Bu talabga koʻra, pesadagi konflikt (q.) hal etilishi, syujet (q.) rivoji esa bir vaqtning oʻzida yuz berishi (qahramonlarning bir sutkadan ortiq boʻlmagan vaqt ichidagi hayoti, kechinmalari tasvirlanishi), bu harakat va holat bir joyning oʻzida (shahar, qishloq, uy va h. k.) boʻlib oʻtishi shart. Vaqt, oʻrin va harakat birligi klassitsist dramaturglar pesalarining mundarijasi hamda ularning syujet yaratish prinsiplarini belgilab bergan. Vaqt, oʻrin va harakat birligi asarga katta ixchamlik, yigʻiqlik baxsh etsa ham, biroq bu talablar dramatik asarlardagi keng hayotiy qamrov va realistik tasvirni, voqea va hodisalarni rivojlanishda berishni cheklab qoʻyar edi. Bu talablar koʻp hollarda sahna asari konflikti va shunga muvofiq yaratiladigan syujetning sunʼiy tuzilishiga olib kelar edi. Klassitsizmning koʻzga koʻringan namoyandalari Kornelning «Sid» va «Goratsiy», Rasinning «Avliddagi Ifigeniya» pesalari vaqt, oʻrin va harakat birligi talablari asosida yozilgan asarlar hisoblanadi., vaqt, oʻrin va harakat birligi