Хокку

xokku. Yapon poeziyasidagi janrlardan biri. Xokku XVI—XVIII asrlarda shahar madaniyatining oʻta darajada rivojlanishi oqibatida yuzaga keldi. Uning qadimgi maktabi kafu boʻlib, bu maktab tanka (q.) ning hajmini bir oz qisqartirish, mavzu doirasini kengaytirish, mazmunan soddalashtirish hisobiga xokku yaratdi. Shuning uchun ham kofu maktabi yaratgan xokkularning anʼanaviy vazni quyidagichadir: birinchi misra — 5, ikkinchisi — 7, uchinchisi — 5 hijodan iborat. Kofu maktabining asoschisi Matsunaga Beytokudir. Keyinchalik bu maktab oʻrniga Nisiyam Soin maktabi yuzaga keldi va xokku tabiatiga katta oʻzgarishlar kiritdi. U xokkuning uslubini bir oz soddalashtirdi, mavjud anʼanalardan maʼlum darajada chekindi. Natijada bu janrning vazifasi oddiy koʻngil ochishdan iborat boʻlib qoldi. Shu sababli keyin yaratilgan koʻpgina xokkular komik xarakter kasb etadi.