Хавфли моддалар

– инсон, ҳайвонлар ва атроф муҳит учун жисмоний ёки биологик хавфга эга бўлган моддалар. Х.м. га портловчи (аммонит, динамит ва бошқ.), оксидланувчи (органик пероксидлар), ўта алангаланувчи (водород, метан, этан, этилен, углерод оксиди, ацеталдегид, этилен оксиди), енгил алангаланувчи (гидридлар, фосфор, эритувчиларнинг кўпчилиги), алангаланувчи (нефтни ҳайдаш маҳсулотлари), заҳарли, қичиштирувчи, кансероген, ионлаштирувчи, мутаген моддалар ва бошқалар киради. Х.м. га махсус тамға босилиши ва ёрлиқ ёпиштирилиши керак. Сақлаш, ташиш ва фойдаланиш хавфсизлик қоидаларига риоя қилган ҳолда амалга оширилади.