VIBOR TIPA BUROVIX RASTVOROV — Burgʻilash eritmasi turini tanlash

VIBOR TIPA BUROVIX RASTVOROV — Burgʻilash eritmasi turini tanlash

1. quduqning chuqurligi, geologik kesimi va sharoiti, tanlangan konstruksiyasiga koʻra eritma xilini tanlash. Quduq qazish maʼlum darajada burgʻilash eritmasiga, kimyoviy ishlov berish metodikasi va vositalariga bogʻliq. Shu sababli burgʻlashni boshlashdan avval eritma tarkibi va xususiyatlari aniqlanadi, har bir oraliqda quduq konstruksiyasiga mos keluvchi eritmalar tanlanadi. Ayrim maydon uchun yoki geologik-texnik sharoitlari oʻxshash maydonlar guruhi uchun burgʻilash eritmalarining texnologik reglamentlari ishlab chiqiladi, bunda: burgʻilanadigan oraliqdagi jinslarning litologik tarkibi, quduq konstruksiyasi, murakkablashishi mumkin boʻlgan oraliqlar, tavsiya qilinayotgan eritma turi, eritmani tayyorlashda va kimyoviy ishlov berishda qoʻllaniladigan materiallar va reagentlar, qaziladigan har bir metrga ketadigan eritma sarfi va b. koʻrsatiladi. B.e.t.t. asosan qatlam bosimidan kelib chiqadi. Agar qatlam bosimi normal gidrostatik bosimga teng yoki yaqin boʻlsa, unda normal zichlikka (1,15—1,30 g/sm³) eritma xili tanlab olinadi. Qatlam bosimi gidrostatik bosimdan bir necha barobar katta boʻlsa u holda eritmani ogʻir xili tanlanadi. Yengil va ogʻir eritmalarni tayyorlashda unga sarflanadigan kimyoviy reagentlar miqdori ham turlicha boʻladi. Shuningdek, burgʻilash eritmasi xilini tanlashda qatlamning harorati ham katta rol oʻynaydi. Burgʻilash chogʻida temperatura (200°S va undan yuqori), erigan tuzlar va maydalangan zarralar hisobiga eritmaning tarkibi va xususiyati doimo oʻzgarib boradi. Eritma tarkibi va xususiyatlari barqarorligini saqlash maqsadida ularga qayta ishlov beriladi. Buning uchun qoʻshiladigan reagentlar miqdori aniqlanadi va ishlov berish bir necha marotaba takrorlanadi.