uchastka

ot 1. Biror maqsadda ajratilgan yer boʻlagi, maydon.

Bundan chiqadigan suv bilan maktab uchastkasinigina emas, unga tutashgan tomorqa yerlarni ham sugʻorish mumkin. — H. Nazir, Choʻl havosi

El-murod polkdan oʻz bataloniga uchastka olib, mudofaaga oʻtganda, tong yorishib qolgan edi. — Shuhrat, Shinelli yillar

2. Yer maydoni, dalaning biror belgisi bilan oʻziga xoslikka, alohidalikka ega boʻlgan boʻlagi.

Koʻchatxonada bir uchastka tayyorlanib, unga majnun archa koʻchatlari oʻtqazildi. — Gazetadan

3. Maʼlum bir xoʻjalikning hududiy jihatdan ajratilgan, alohida boʻlimi.

Oʻrmonjon bugun, negadir hamma uchastkaga bordi, kechga yaqin uyiga qaytdi. — A. Qahhor, Qoʻshchinor chiroqlari

4. Biror nuqtayi nazardan chegaralanish-da hududiy ichki boʻlinma, boʻlinmalar; hu-dudlar.

Xalq sudlarining hozirgi vaqtda amalda boʻlgan uchastka sistemasini tugatish va yagona tuman (shahar) xalq sudlarini tuzish koʻzda tutiladi. — Gazetadan

Hozir, sen kelmasdan bir oz burun, bir odamni Qumariqqa yubordim. Uchastka pristavi ham oʻsha yer-da. — Choʻlpon, Kecha va kunduz

5. Maʼlum bir ish-faoliyat olib borilayotgan, unga oid joy, obyekt.

Qurilish uchastkasining boshligʻi Gulboy Boʻriyevning ishonchi komilki, yirik obyekt ham belgilangan muddatda aʼlo sifat bilan topshiriladi. — Oʻzbekiston qoʻriqlari

Erkaklar bilan teng huquqli ayollarni bugungi kun-da ishlab chiqarishning barcha uchastkalarida uchratish mumkin. — Gazetadan

6. s. t. Xususiy uy-joy qurish uchun rasmiy ravishda ajratib berilgan yer, maydon va unda barpo etilgan hovli-joy.

Ularning uchastkasi hali bitmagan, ikki uyni xomsuvoq qilib, koʻchib kirishgan edi. — Oʻ. Hoshimov, Qalbingga quloq sol

Uchastka olish uchun ariza berganimga ikki yil boʻldi, haligacha darak yoʻq. — Mushtum

Bu orada yer tuzuvchi Xudoy Nazarov bilan oʻzingiz ikkitadan toʻrtta uchastka qurib oldingiz. — Mushtum

участок

n garden plot (poliz ekinlari maydoni)