tuman
туманtuman I
ot 1. Atmosferaning quyi qatlamlarida yuzaga keladigan mayda suv yoki muz zarralari.
Quyuq tuman. Tonggi tuman.
Havo tuman boʻlganidan oʻrmon koʻzga koʻrinmas edi. — M. Muhamedov, Qahramon izidan
Sal oʻtmay soylikni oqish harir tuman qopladi. — O. Yoqubov, Izlayman
Roʻparada past-baland choʻqqilarini osmonga turtib, koʻkish tuman pardasiga burkangan Chotqol togʻlari. — P. Tursun, Oʻqituvchi
2. koʻchma Tumanga oʻxshash, xira, nimqorongʻi holat.
Bahorning fikri bulut bosgan osmonday qorongʻilashdi-yu, koʻz oldini tuman chulgʻadi. — Sh. Rashidov, Qudratli toʻlqin
- Yuzi tuman boʻlmoq Uyatga qolmoq, sharmanda boʻlmoq. Mahrami-man kelib qizing koʻrmaymi? Siyosatman kelib tortib olmaymi? Undan keyin yuzing tuman boʻlmaymi? — Alpomish
- Yuzini tuman qilmoq Uyatga qoldirmoq, sharmanda qilmoq. Sen eshitgin menday mardning soʻzini, Tuman qipsan bek otangning yuzini. — Alpomish
tuman II
ot 1. esk. Oʻn ming.
Birniki mingga, mingniki tumanga. — Maqol
2. Nihoyatda koʻp, sanogʻiga yetib boʻlmaydigan, tumonat.
Salomatlik — tuman boylik. — Maqol
Biz uchun eng avvalo tuman boyliklar yaratishga qodir boʻlgan odamlarning salomatligi kerak. — Gazetadan
3. tar. Tilla barobarida oʻn ming soʻm.
[Sohib Doro:] Xalifamiz oʻtgan kuni devon qurib, vazirlari va beklaridan ikki tuman aqcha topib bermoqni talab etibdurlar. — M. Osim, Zulmat ichra nur
4. tar. Markaziy Osiyo va Xurosonda: oʻn ming otlikdan iborat askariy qism, diviziya.
Men., bir tuman birla gʻanimning oʻng qoʻlidan orqasiga oʻtib oldim. — M. Osim, Oʻtror
Turgin, ota, qara, naq tuman Dushman kelar sarhadma-sarhad. — X. Davron, Bolalikning ovozi
tuman III
ot 1. tar. Sharqda, jumladan, Oʻzbekistonda 20-asr 20-yillarigacha maʼmuriy-hududiy boʻlinish; uyezd;
Shu oʻttiz chaqirimlik ariq qazilib bitganda, Namangan va Andijon tumanlaridan ikki ming botmongacha yer sugʻorilar edi. — A. Qodiriy, Mehrobdan chayon
Mardon asli Sherobod tumaniga qaraimi bir qishloqlik yigit. — M. Osim, Elchilar
2. Oʻzbekistonda: viloyat, shahar hududida ularning tarkibiy qismi boʻlgan maʼmuriy-hududiy boʻlinma.
Fargʻona viloyatining Oltiariq tumani. Toshkent shahrining Yakkasaroy tumani.
Bu haqda hikoya qilishni tumandagi oilalardan boshladik. — Gazetadan
tuman IV
ot shv. Tuban, quyi.
tuman V
ot Eronda 1932 yilga qadar muomalada boʻlgan pul birligi.