тақалмоқ

фл. 1. Тақамоқ феълининг ўзлик ва мажҳул нисбатлари.

Ёғочнинг учи деворга тақалган. Қайиқ бориб қирғоққа тақалди.

Ҳозир суҳбат Элчибекка келиб тақаладигандай эди. — А. Мухтор, Туғилиш

Суви анча тортилиб қолган кўлнинг шимолий этаги қишлоқ уйларининг ҳовлиларига бориб тақалар эди. — М. Исмоилий, Фарғона тонг отгунча

Камар бир одам бемалол энгашиб юра оладиган бўлиб, охири қаерга бориб тақалишини ҳеч ким билмасди. — П. Турсун, Ўқитувчи

2. Бирор нарсанинг битишига, юзага келишига қараб қолмоқ, у билан боғлиқ бўлмоқ.

Рухсатнома ёзилган. Иш суратга тақалиб қолди. Бугун у ҳам тайёр бўлади. — Н. Сафаров, Саодатнинг қиссаси

Кўп нарса замонавий машина-ускуналарнинг етишмаслигига бориб тақалади. — Муштум