Система образов

obrazlar sistemasi. Badiiy asardagi bir-biri bilan bogʻlangan obrazlar guruhi. Obrazlar guruhi deganda faqat kishilar obrazi tushunilmay, balki ramziy obrazlar: osmon, bulut, yulduz, bahor kabilar ham anglashiladi. Obrazlar sistemasini faqat yaxlit bir asardagina emas, balki biror shoir yo yozuvchi ijodiga mansub bir qancha asarlarda ham uchratish mumkin. Masalan: Natasha Rostova, Anna Karenina, Andrey Bolkonskiy, Hojimurot, L. Tolstoy yaratgan obrazlar sistemasidir. Bu obrazlar bir ijodkor qalamiga mansubligi bilan obrazlar guruhini tashkil qiladi. Rus shoiri S. Yesenin ijodiga nazar tashlasak, oʻrmon, qayin, bugʻdoyzorlar obrazi sistemasini koʻrish va ular orqali Rossiya tabiati, shoirning vatani bilan tanishish mumkin. Biror yozuvchi yoki shoir ijodiga mansub asarlardagi obrazlar guruhi mohiyatiga koʻra, yanada kichikroq guruhlarga — ijobiy obrazlar va salbiy obrazlar guruhiga boʻlinadi. Masalan, Hamzaning «Boy ila xizmatchi» dramasidagi Gʻofir, Jamila — ijobiy obrazlar guruhi; Solihboy, Qodirqul — salbiy obrazlar guruhiga misol boʻla oladi.