shipillamoq

fl. 1. Ship-ship qilmoq; shitirlamoq.

Hovlida daraxt shoxlari shipillab, qizni chorlaganday boʻldi. — J. Saʼdullayev, Qiz orzusi

Vaqt ham allamahal boʻlib qolgan, butun kasalxona uyquda. Faqat ahyon-ahyonda shipillagan oyoq tovushi eshitilib qoladi. — X. Toʻxtaboyev, Sadoqat

2. Yengil va tez-tez qadam tashlamoq, yengil va tez-tez yurmoq; zipillamoq.

— Laylatulqadr bizlarni izzat qilib, oʻz oyogʻi bilan uyimizga kirib kelgan ekan. Ana, hozir shipillab chiqib ketdilar, — dedi Sharifa buvi eriga. — N. Maqsudiy, Laylatulqadr

U [Xayri xola] hasharchilarni alqay-alqay, shipillagancha qoʻrgʻonchaga kirib ketdi. — M. Osim, Tilsiz guvoh