шакл

от 1. Нарсанинг ташқи кўриниши, сиртқи қиёфаси, ифодаси.

Учбурчак шаклидаги жисм. Айиқ шаклидаги қоя. Шаклини ўзгартирмоқ. Бирор шаклга киритмоқ.

Дераза ойналарига турли шаклда қийиқ қоғозлар ёпиштирилган. — Ойбек, Қуёш қораймас

Дўкондор уларга қалин китоб шаклида бир нимани тутқазди. — Ойбек, Танланган асарлар

2. мат. Маълум кўриниш, қолипдаги нарса, фигура.

Геометрик шакллар.

3. физ. Жисмнинг ҳолати, кўриниши.

Муз сувнинг қаттиқ шаклидир.

4. Мазмуннинг ифода томони, ташқи кўриниши, ифодаланиши.

Бу ажойиб асар-обидада минг-минглаб ўзбек оилаларининг жасорати умумлашма шаклида ифодаланган. — Газетадан

Янги давр қўшиқлари анъанавий шакллар тасвир воситаларисиз туғилиши ҳамда ёйилиши мумкин эмас эди, албатта. — ЎТА

5. кўчма Бирор нарсани амалга ошириш ёʻсини; усул.

Сен билан иккимиз икки шаклда ўйлаймиз.

Пахта фронтидаги ижобий меҳнат хилма-хил шакллар касб этяпти. — Ҳ. Ғулом, Ишонч

Адабий алоқаларимиз янги-янги шакллар билан бойиди. — Газетадан