СЕЙСМОПРИЕМНИК

Seysmopriyemnik — tuproqning mexanik tebranishini elektr kuchlanishga aylantiradigan elektr mexanik asbob. S.ning ishlash usuli quyidagicha: mexanik toʻlqinlar korpusga urilib oʻzgarmas magnitni harakatga keltiradi va natijada gʻaltakdagi magnit maydon oʻzgaradi. Magnit maydonning oʻzgarishi simli gʻaltakda induktiv tok hosil qiladi. Uning kuchi oʻzgarmas magnitning tebranishiga bogʻliq. S. mexanik tebranishlarni elektr kuchlanishga oʻzgartirib, maʼlumotni sim orqali seysmostansiyaga yetkazadi. S. seysmik kanalning bir qismi va uni toʻlqin qabul qilgich deb ham yuritiladi.