Развязка

Badiiy asar asosida yotuvchi konfliktning hal etilishini bayon etuvchi syujet qismi. Yechim asardagi tugunning mantiqiy yakuni sifatida yuzaga kelgandagina oʻquvchini ishontira oladi. Yechimning xarakteri ijodkorning dunyoqarashi, mahorati bilan bogʻliq boʻlishidan tashqari, u adabiyotdagi hukmron ijodiy metod, yoʻnalish va oqimlar bilan ham bevosita bogʻliqdir. Masalan, romantik ijod tipiga mansub xalq dostonlari, ertaklarida asar xalq ideali bilan bogʻliq holda asosan muvaffaqiyat qozonish yechimi asosida yakunlanadi. Biroq realistik adabiyotda yechim xarakteri real voqelik, shart-sharoit taqozosiga bogʻliq. Masalan, Abdulla Qahhorning «Sinchalak» povestidagi yechim Saidaga xos partiyaviy prinsipiallikning gʻalabasi va manmanlik, oʻzboshimchalik hamda shaxsiyatparastlikning yengilishida ifodalanadi. Demak, realistik adabiyotda asar yechimi asar tugunining mantiqiy rivoji, tasvirlangan shart-sharoit taqozosi bilan bogʻliq holda yuzaga keladi. Yechimning asar kompozitsiyasidagi oʻrni aksariyat hollarda syujetning kulminatsiyasidan keyin boʻlsa ham, biroq baʼzan yozuvchining xohishi, manerasiga bogʻliq ravishda syujetning boshlanishida ham uchraydi, yaʼni avval yechim berilib, soʻngra shu yechimni asoslovchi voqealar tizmasi bayon etilishi mumkin., yechim