РАЗВЕДКА РАДИОМЕТРИЧЕСКАЯ

Radiometrik razvedka — foydali qazilma konlarini izlash va razvedka qilishning dala, laboratoriya va karotaj usullari majmuasi. R.r. geologik xaritalash, togʻ jinslarining fizik xususiyatlarini oʻrganish, tabiiy radioaktiv elementlarning spektral tarkibi va jadalligini qayd qilishga asoslangan. Dala ishlarida, asosan, radiometrik (gamma) syomka qoʻllaniladi. Marshrut, profil yoki oldindan belgilangan toʻr (setka) boʻyicha togʻ jinslari radioaktivligining nisbiy oʻzgarishi oʻrganiladi va umumiy radioaktivligi baholanadi. Radiometrik syomka piyoda, avtomobil, samolyot yoki vertolyotda bajariladi. SRP radiometri va SP spektrometridan amaliyotda foydalaniladi. Radiometrik ishlarni burgʻilangan quduqlarda (gamma karotaj), kon va dengizda oʻtkazish mumkin.