рамз

от 1. Бирор ғоя, тушунча, ҳодиса кабиларни ифодаловчи, эслатувчи шартли белги, ишора.

Дўстлик рамзи. Кабутар — тинчлик рамзи.

Она ўлкам менинг рамзи садоқат, Дурлар шодасида дурдона гўё. — Э. Воҳидов, Муҳаббат

Санъаткор Бернора, мовий кўл фарзанди, садоқат рамзи — Оққушга айланиб, равон сузиб чиқади саҳнага. — Саодат

Ёдгорликлар муқаддас нодир мерос сифатида Ватанга садоқат рамзи бўлиб, авлоддан авлодга ўтиб боради. — Н. Сафаров, Оловли излар

Биз, озод Ўзбекистон фуқаролари учун мустақилликнинг муқаддас рамзлари — Давлат герби, Давлат мадҳияси азиздир. — Газетадан

2. Қочириқ ёки ишора билан айтилган гап; имо-ишора, шама.

Рамз билан гапирмоқ.

Латифа, аския, рамз-у киноя Ўтар улфатлар ичра бениҳоя. — Ҳабибий

Саидий, гарчи кейинчалик Ёқубжоннинг рамзига тушунган бўлса ҳам, бу гапни ҳақоратга қарши ҳақорат тарзида айтди. — А. Қаҳҳор, Сароб

Ҳасрат тўла сўзингдан озор топар нигорим, Рамзи ишора бирлан қилгин уни ифода. — Э. Воҳидов, Ёшлик девони

3. Рамз (эркаклар исми).