poʻk

пўк

4 ta lugʻatda uchraydi JSON Shevalarda Barcha qidiruv natijalari

Izohli lugʻat

poʻk I

sft. 1. Ichi chirigan yoki kavak.

Poʻk daraxt. Poʻk yogʻoch. Bu tolning ichi poʻk.

Nusratbek ham shunday qildi. Biroq rediska poʻk ekan. Tuflab tashlashga uyaldi. — S. Nurov, Narvon

2. Biror kasallik tufayli daraxt tanasidan oʻsib chiqadigan, gʻovak toʻqimadan iborat oʻsimta; daraxt buqogʻi.

Tolning poʻki.

Tut poʻkidan sariq boʻyoq sifatida foydalanilgan.

Bu jangga dushman oʻz ixtiyoridagi hamma narsani tashladi; uning orqa tomoni qurigan daraxtdek poʻkdir. — H. Olimjon, Tanlangan asarlar

3. koʻchma Semiz, lekin kuchi kam; xom-semiz.

Dalaning koʻkiga, odamning poʻkiga ishonma. — Maqol

Mehnat qilib oʻrganmagan Kamol poʻk edi, bir-ikki siltanib, qoʻllarini Nodirdan zoʻrgʻa boʻshatib oldi. — S. Yunusov, Kutilmagan xazina

4. koʻchma Maʼnosiz, sayoz, boʻsh (umri qisqa).

Zamon poʻk narsani tez unutdirar, Yaʼni turgʻunlikdan hayot oʻch olar, Eski loy qalʼa yoʻq, qissasi turar, Yerga choʻkib ketgan eski koʻchalar. — M. Shayxzoda, Toshkentnoma

5. shv. Poʻkak, tiqin.

Tarelka yonida yotgan pichoqni olib, uning uchi bilan shisha ogʻzidagi poʻkni olmoqchi boʻldi. — Sh. Rizo, Qor yogʻdi, izlar bosildi.

[Mingboshi] Shishaning tagiga yoʻgʻon shapalogʻi bilan ikki marta urdi, poʻk sachrab chiqib, shipga tegdi, soʻngra u yerdan sachrab, tokchadagi katta jomga kelib tushdi; jar-r-rang etdi jom. — Choʻlpon, Kecha va kunduz

Poʻk bermoq Qoʻrqish yoki qatʼiyatsizlik orqasida ogʻizdan gullamoq, valdiramoq, sir boy bermoq. Nima balo boʻldi, ering ikkovimizning ishimizni sezib qolganmi deymanov, yoki poʻk berib qoʻydingmi? [dedi yigit xotinga]. — Gʻ. Gʻulom, Shum bola
Poʻk uchmoq Yolgʻon gapga ishonmoq, laqqa tushmoq, laqillamoq. — Omon ham mening gapimga poʻk uchgan boʻlsa kerak, ikki gapning birida haha, haha, deb qoʻyar edi, — dedi Shum bola. — Gʻ. Gʻulom, Shum bola

poʻk II

sft. Ichi boʻsh yoki kavak narsani urganda, qizdirilmagan childirmani chertganda, yurakning qattiq urishida chiqadigan tovush haqida.

Pishgan qovoq chertilsa, poʻk etadi.

Ahyon-ahyonda shampanskiyning poʻk etgan ovozi eshitilib qoladi. — Mushtum

Dutorning tingʻir-tingʻiri-yu childirmaning poʻk-poʻk tovushini atrof yutib yuborayotganday edi. — Yoshlik

Ruscha-oʻzbekcha va oʻzbekcha-ruscha lugʻat

poʻk

пустой, рыхлый, трухлявый