ПАССИВНЫЕ КОНТИНЕНТАЛЬНЫЕ ОКРАИНЫ

okeandan kontinentga qadimiy va zamonaviy oʻtish zonalarining bir turi. S.k.ch. yosh okean havzalarini (Atlantika okeani turi) oʻrab turuvchi strukturalar majmuidan iborat. Tektonik harakatlar va vulkan jarayonlari faolligi bu joylarda butunlay kuzatilmaydi. S.k.ch. kontinentlarning boʻlinishidan va yangi okean ochilishidan hosil boʻladi. Ularning geologik tuzilishi oʻziga xos boʻlib, quyidagilardan iborat: 1) S.k.ch. zonasida okean va kontinental poʻst oraligʻida keskin oʻtish kuzatiladi; 2) okean qirgʻogʻi boʻyicha kuzatiladigan anomaliya S.k.ch. qiyofasiga parallel joylashgan; 3) S.k.ch rayonlarida ularning chegaralarini kesib oʻtuvchi avlakogenlar rivojlangan. Shuningdek, S.k.ch.ga nisbatan parallel joylashgan va yassilanib boruvchi tashlama-uzulmalar sistemasi mavjud; 4) shelf chegaralarini kesib oʻtuvchi bimodal seriyasidagi lavalarni katta maydonlarga quyilishi kontinentlardagi issiq nuqtalar vulkanlariga geokimyoviy tarkibi boʻyicha mos keladi; 5) S.k.ch. chegarasida terrigen choʻkindilarning qalin qatlami rivojlangan. Qitʼa bloklarini, okean tubi va atrof qismini litostatik bosim taʼsirida egilishi choʻkindilar toʻplanishini tezlashtiradi., Sust kontinental chekkalar