pashsha
пашшаpashsha
ot Yozda juda koʻpayib ketadigan, turli suyuq organik moddalar bilan oziqlanadigan qoʻsh parda qanotli hasharot.
Yoʻl pashsha. Pashshalarni qoʻrimoq. Qora pashsha.
Atrofda gʻuv-gʻuv pashsha: oyoqlarga yopishadi, burun kataklariga suqiladi, quloqlarni uzadi. — Oybek, Tanlangan asarlar
Hamma yoq jim. Faqat pashsha gʻingʻillaydi. — A. Qahhor, Bemor
- Oshga pashsha boʻlmoq Marziyanikiga borganimda doim oshga pashsha boʻladiganlar Dushan bilan Fozil edi. — A. Muxtor, Davr mening taqdirimda
- Oshga pashsha tushmoq Begona kishi aralashib, ishni buzmoq, ishning beliga tepmoq. — Esizgina, endi gaplasha boshlagan edik-a. Oshga pashsha tushdi, — dedi Elmurod boshini chayqab. — P. Tursun, Oʻqituvchi
- Pashsha(ni) qoʻrib oʻtirmoq Bekor vaqt, kun oʻtkazmoq, kunni bekorga oʻtkazmoq. [Boboqul ota:] Hamma dalaga yopishib yotgan boʻlsa-yu, men idorada pashsha qoʻrib oʻtirsam kelishmas. — H. Nazir, Soʻnmas chaqmoqlar
- Pashshadan fil yasamoq yoki pashshani (yoki pashshaday narsani) fil qilmoq Arzimas narsani oshirib yubormoq, ulgʻaytirib koʻrsatmoq, haddan tashqari mubolagʻa qilmoq. Uzzukun pashshani fil qilib, qayoqdagi gaplarni chulgʻatib yurdingiz, mana endi el oldida yuzingiz shuvut. — A. Muhiddin, Koʻngillar