озодлик
ozodlikозодлик
от 1. Эркинлик, ҳурлик; ҳеч қандай мажбурият билан боғланмаганлик.
Миллий озодлик.
Бахт озодлик ва фаровонликдир. — Газетадан
Чунки озодликни ҳамма ҳам чапак чалиб, хурсандчилик билан кутиб олмаслиги табиий. — Газетадан
Аҳмад Ҳусайннинг бутун дили, фикри, эътиқодича, ҳақиқат озодлик демакдир. — Ойбек, Нур қидириб
2. тар. Эски мактабда ҳар пайшанба куни домлага ёки отинбибига ўқувчилар томонидан келтириладиган ҳақ; пайшанбалик (пул, нон, дон каби).
— Домлагаям озодлик опкелдингми? — деди бола дам дастурхонга, дам тугунга тикилиб. — П. Турсун, Ўқитувчи
— Бувингга бориб айт! Агар озодлик келтирмасанг, янги сабоққа тушмайсан! — деди домла. — Н. Сафаров, Султон бўзчининг неваралари
- Озодликдан маҳрум қилиш Жиноят содир этган шахсни махсус ажратилган тарбиявий муассасаларда мажбурий сақлашдан иборат жазо тури.
- Озодликка чиқармоқ Асоратдан, қулликдан чиқармоқ, эркинликка эриштирмоқ, эрк бермоқ.
- Озодликка чиқмоқ Асоратдан, қулликдан чиқмоқ қутулмоқ; эркинликка эришмоқ; қамоқдан чиқмоқ, озод бўлмоқ. Баҳромбекнинг кўз олди қоронғилашиб кетди. Олти ярим йил! Озодликка чиқсам ҳам, шунча йил умр кўрармиканман? Бу ерда қолсам, қаерларда хор-зор бўлади жасадим. — Ёшлик