necha

olm. 1. Son-miqdor haqida soʻroqni bildiradi; qancha?

Kostyum necha soʻm turadi? Soat necha boʻldi? Zavodda necha yil ishladingiz? Bir necha odam. Bir necha vaqt. Fargʻonaga necha marta borgansiz? Men buni senga necha marta aytdim!

Xon janoblaridan soʻraydirgan bir necha tilaklarim bor. — A. Qodiriy, Oʻtgan kunlar

2. His-hayajonni bildiruvchi gaplarda miqdorning son-sanoqsizligini, koʻpligini bildiradi.

[Xolmat:] Men sizning ishqingizda necha yildan beri kuyib yuribman-a. Endi bundan ortiq chidashga hech toqatim yoʻq. — Hamza, Tanlangan asarlar

Poyezd necha soat yoʻl yurgandan keyin ana shu bekatchalarning biriga kelib toʻxtadi. — A. Qahhor, Asarlar