narsa

ot 1. Har qanday moddiy mavjudot; predmet.

Yoʻldoshning koʻzi komissarning toʻshidagi tangadek qora narsaga tushdi. — Shuhrat, Shinelli yillar

Xotinning berib ketgan narsasi uch-toʻrt buklangan bir qogʻoz edi. — A. Qodiriy, Oʻtgan kunlar

2. Hayot, tirikchilik uchun zarur har qanday ashyo, buyum, mahsulot.

Osh — yaxshi narsa.

Mana sizda narsa bor ekan, sotibsiz, bizda bir parcha yerdan boshqa koʻzga ilinarli hech narsa yoʻq edi. — Oybek, Tanlangan asarlar

Charos koridorda teskari qarab turar, qoʻlida gazetaga oʻralgan patnisga oʻxshash narsa bor edi. — Oʻ. Hoshimov, Qalbingga quloq sol

3. Umuman, har qanday hodisa (gap, soʻz, oʻyin, kulgi, ish, voqea, hodisa va shu kabilar).

Barot polvon dunyoda ikki narsani yaxshi koʻrar edi. Birinchisi — kurash, ikkinchisi — ashula. — M. Ismoiliy, Fargʻona t.o

Begimxon xatni qayta-qayta oʻqidi. Goʻyo xatda hamma narsa yozilgan. — I. Rahim, Chin muhabbat

4. s.t. Odam va umuman jonli mavjudot yoki ularning sifatini bildiruvchi soʻzlar bilan qoʻllanib, ularning shu soʻzlar ifodalagan toifaga mansubligini ifodalaydi.

Sen yosh narsa, qolaver, men ketay, ertaga azon bilan kolxozga chiqib ketaman. — Oydin, Fonar tagida

Oʻris amaldorga tegajaklik qilishni unga kim qoʻyibdi? Kambagʻal narsa chorigʻini sudrab, tinch yursa boʻlmasmidi?! — Oybek, Tanlangan asarlar