Межязыковая паронимия

Tillararo paronimlik

Yaqin tillardan tarjimada nafaqat tillararo omonimlar, balki tillararo paronimlar ham tarjimonlarni chalgʻitadi. Paronimlar “talaffuzi, eshitilishi va morfem tarkibi oʻxshash, leksik maʼnolari boshqa-boshqa yoki qisman yaqin boʻlgan soʻzlar” boʻlib, ularga “mucha” (aʼzo, unsur) soʻzini – “muchal”, “don” (toʻn)ni – “don” (gʻalla, urugʻ), yoki tan, “dulluk” (tullik, bevalik)ni – “toʻliq”, “bela” (balo)ni – “bola”, “sonuram” (oʻylayman, xayol qilaman)ni – “sogʻinaman”, “gʻiliq” (qayliq)ni – “qiliq” kabi soʻzlarni yanglish tushunish va xato talqin qilish kiradi. Bunday kamchiliklar yaqin tillardan tarjima qiluvchi deyarli barcha tarjimonlarda bor. Jumladan, Maxtumqulining “koʻngul” radifli gʻazali tarjimasida M. Kenjabek “bagʻtim siyasidir” jumlasini “boqtim: siyosiydir” deb tarjima qiladi. Holbuki, u “baxtim siyosidir” – “baxtim qorasidir” boʻlishi kerak.