maydon

ot 1. Hovli-joyga yaqin ochiq yer, sayhon yoki bogʻcha; tomorqa.

Maydon ikki tanob kenglikda boʻlib, janubi qutidor va qoʻshnisining imoratlari orqasidan va boshqa uch jihati ham shunga oʻxshash binolardan iborat edi. — A. Qodiriy, Oʻtgan kunlar

2. Umuman, ochiq yer, sayhon yoki ekinzor.

Paxta maydoni. Ekin maydoni.

Ilgʻor xoʻjaliklarning chigit ekilgan maydonlari yashil libosga burkandi. — Gazetadan

3. Biror ish-harakat, tadbir uchun moʻljallangan yoki shunday ish-harakat yuz beradigan, bajariladigan joy.

Sport maydoni. Mashq maydoni. Kurash maydoni. Jang maydoni.

Mard maydonda bilinar. — Maqol

Amir yengildi, askarlari buzilib, urush maydonidan qochdilar. — S. Ayniy, Qullar

Ayniqsa, uloq boʻlayotgan maydonda tumonat odam. — K. Yashin, Hamza

4. koʻchma Jabha, soha, doira.

Ish maydoni. Mafkura maydoni.

Men qirq yildan buyon adabiyot maydonida qalam tebratib kelyapman. — Oybek, Xalqqa xizmat — baxt

5. fiz. Biror fizik hodisa roʻy beradigan yoki uning taʼsiri seziladigan fazo.

Elektr maydoni. Magnit maydoni.