material

ot 1. Biror maqsad uchun kerakli xomashyo, modda.

Qurilish materiallari. Bodomning yogʻochi duradgorlik va uskunasozlik uchun yaxshi material hisoblanadi.

Zargar materialning konstruktiv va egiluvchanlik imkoniyatini yaxshi bilishi kerak. — Gazetadan.

2. Asos yoki dalil vazifasini oʻtaydigan maʼlumot, manba va shu kabilar

Ilmiy ish uchun material toʻplamoq.

Oʻzbekistonlik jangchi yigitlarning partizanlar harakatiga qoʻshilib, shafqatsiz jang olib borganliklarini arxiv materiallari asosida oʻrganib, jonlantirdim. — Nazarmat, Joʻrlar baland sayraydi

3. Umuman, biror narsa haqida mavjud boʻlgan, tayyorlangan, eʼlon qilingan narsa.

Jurnal sahifalaridan oʻrin olgan materiallarning hammasi ham bir saviyada emas. — F. Musajonov, Himmat

Baʼzan idorada gazeta uchun material tayyorlash qiyin boʻlganidan, Mustahkam akaning choyxonasida kechalari material ishlab, ertalab ishga kelardim. — N. Safarov, Olovli izlar

4. Gazlama, mato.

Kostyumbop material. Shimlik material.