ЛАБОРАТОРНОЕ ОПРЕДЕЛЕНИЕ КОМПОНЕНТОВ ВОДЫ

litosfera suvlarining kimyoviy va gaz tarkibi komponentlarini aniqlash. Bu maqsadda anʼanaviy kimyoviy-analitik tahlil usullari majmuasidan tortib kimyoviy asboblar (spektral tahlil, alanga fotometriyasi, mass-spektrometriya va b.) tahlillaridan ham foydalaniladi. Suvlarning ion-tuzli tarkibi makrokomponentlari hamda erigan gaz komponentlarini aniqlash usullari darslik va maxsus qoʻllanmalarda yetarli darajada yoritilgan. Suv tarkibidagi organik moddalar va mikroelementlar miqdori nisbatan kam boʻlganligidan ularni aniqlash ancha murakkab kechadi. Neft-gazli hududlardagi suvli eritmalar odatda shoʻr suvlar va namakoblardan iborat. Ulardagi tuzlar miqdori 10—50 dan 200—300 g/kg ga yetadi. Suvda erigan organik moddalar komponentlari miqdori esa $10^{-2}$—$10^{-5}$mg/l atrofida. Koʻpgina mikroelementlar miqdori undan ham kam ($10^{-1}$—$10^{-6}$mg/l). Suvdagi mikroelementlar tahlili usullari ichida spektral usul keng qoʻllaniladi. Uning yordamida minerallashganligi 50 mg/l boʻlgan qatlam suvlarining 1l ida 20 xilga yaqin mikroelementlarni aniqlash mumkin. A.A.Reznikov va Ye.P.Mulikovskaya, Yu.Yu.Sokolovlar tomonidan taklif etilgan tahlil usullari gidrokimyoviy tadqiqotlar amaliyotida keng qoʻllanilmoqda. Neft-gaz hududlaridagi suvlarning geokimyoviy tarkibini aniq va toʻliq tahlil qilish maqsadida laboratoriya bazalarini quduqlar oldiga koʻchirish ahamiyatlidir. Bevosita, quduq oldida suvlarning Eh va pH koʻrsatkichlarini aniqlash, bir qator eksperimental ishlar oʻtkazish (mas., suvdagi mikrokomponentlar shaklini tahlil qilish) yaxshi natijalar beradi. Koʻchmas laboratoriya bazalarini koʻchma laboratoriyalar bilan hamkorlikda ishlashi bir vaqtda mikroelementlar va erigan organik moddalar miqdorini aniqlash imkonini beradi., Suv komponentlarini laboratoriyada aniqlash